Sunday, June 2, 2013

الانسة نواعم والثلاثي المرح:

عنبر المجانين، قسم العقلاء، مكتبنا الموقر... صحراء جرداء لا بنات فية ولا ماء وانت أدرى مني سيدي الفاضل كيف ان اجتماع ثلاث رجال منفردين في اي مكان كفيل بتحويله الى سيرك عالمي او "زوو"
الى ان فاجأنا القدر متمثل في صورة مديرنا بتعيين الانسة "نواعم" التي هبطت من السماء كالملائكة لتستقر في مكتبنا المتواضع والأوفر حظا بين مكاتب الشركة، ومن يومها أصبح لدى كل منا فجأة دافع قوي للذهاب الى العمل، واختفت ظاهرة التزويغ نهائيا، بل وأصبح المكتب أشبه بخلية نحل في التعاون بعد أن كانت كلمة تعاون تشير الى البنزينة فقط!!

سبحان مغير الأحوال من حال الى حال تحولت ورشة الحرفيين الى حديقة غناء تغرد فيها الانسة نواعم كل يوم بلغات يصعب على أمثالنا فك شفرتها "بونجووور"..."هاااي"..."بااااي" هذا اذا التعريف الدقيق لمصطلح "القوة الناعمة".. واختلفت رائحة المكان بعد أن رسخ في اذهاننا أن تلك الرائحة اللزجة جزء مكمل لديكور المكان اتذكرأول محاولة لها لإلتقاط ملف من أعلى الدولاب حينما سقط فوق نافوخي محدثا فجوة بحجم 3 سنتيميتر، وقتها لم أصرخ اه يا راسي بل خرجت صرختي تلقائية ساذجة اااه يا قلبي عندما لمحت نظرة القلق في عينيها ترافقها جملة انت كويس؟ ثم اسفة مشفوعة بحمرة خجل كانت كفيلة بالتسبب بأزمة حادة لقلبي الضعيف، علمت فيما بعد أن القلق كان من أني أطلع واطي واعمل فيها مذكرة وهي لا تزال في فترة التدريب... ماعلينا
ومن ضمن التغييرات الجذرية التي طرأت مصاحبة للانسة نواعم هي أسماء السادة الزملاء بعد أن كانت شهرتنا "الدفاس، الدأشوم، وأبو دومة" الثلاثي الشهير أصبحنا "سادء، كاسم، و دياء" ريفيرينج تو "صادق، قاسم، وضياء"

ومنذ اللحظة الأولى بدأ ماراثون طويل المدى للفوز بكأس العمر وهو الانسة نواعم..اااه نواعم، اسم على مسمى بالفعل فهي تتميز برقة ونعومة وأنوثة و...احم ما علينا المهم بذل كل منا الغالي في سبيل تحقيق الفوز بالبطولة من عزومات شاي بلبن وبسكوت لوكس على الفطار الى أجيبلك لمون تروقي أعصابك من حرقة دم الشغل مرورا ب هاتي عنك الملفات هي الرجولة ماتت؟ وصولا الى استحالة العينين دي نتعبها في الإكسل شيت ده واجب علينا ... ولم تكن المنافسة نظيفة أبدا بل تخللها الكثير من النفسنة والتوقيع والمقالب والصدف المدبرة!
إلى ان فاجأتني الظروف يوما ما بأكثر مما تمنيت ووجدت نفسي وحيدا مع نواعم...بدون ألقاب كما طلبت هي بنفسها مني، اذن هي الألفة ورفع الكلفة كما قال د/مصطفى محمود، هي تستلطفني اذا!! انا؟؟ نعم انا الفائز، وجدتها بكل معاني الحنان تقول "جبتلك شندوتش مربى جزر معايا" لم احب المربى بحياتي قط ولكني كدت ألتهم أصابع يدي بعد انتهاء الشاندوتش، بل لولا الملامة لكنت احتفظت به محنطا كتذكار لتلك اللحظة التاريخية، ومن يومها صارت النظرات والابتسامات ثم شيئا فشيئا المكالمات، وطبعا السرية هي عنوان المرحلة لأني لا أقبل الاضرار بسمعة شريكة العمر خاصة في مكان العمل. وكأي رجل شرقي محترم فاتحتها في ما يجول بخاطري وما أتمناه وكان الرد دائما بأننا يجب أن نتروى ونفكر جيدا ونأخذ وقتنا في التعارف أو يأتي الرد انها تنتظر اللحظة المناسبة لتفاتح أهلها وكل الأعذار كانت مقبولة ومبررة حينذاك
حتى أتى اليوم المشهود وقد كانت نواعم تقوم بأجازتها السنوية، وبدأ زميلي في التغزل في جمال نواعم وعذوبتها وكيف أن المكتب كالسجن الحربي بدونها، هنا لم أتمالك، نفسي وانفجرت غاضبا وصحت به "احترم نفسك ياأخي دي هتبأة مراتي" رد علي قائلا "انت بتحلم فوق أنا فاتحتها خلاص وده بناء على مواقف عدة حدثت بيننا " ماذا!!!!! وأتى صديقنا الثالث فاغرا فاه وبصعوبة كرر الجملة الأخيرة ثم أعقبها ب "نواعم دي بتاعتي أنا انت ماتعرفش ال..." ويالهول ما وجدنا، أظلمت النيا وضاقت بما رحبت، لقد اكتشف ثلاثتنا أنه قد تم إستغفالنا واستغلالنا بنفس الكيفية وأن السيناريو الرومانسي الذي ذكرته منذ قليل ما هو إلا مشهد مكرر...مشهد أس تلاتة أو اشتغالة تكعيب والتلاتة المغفلين واضح من هم، أرجوك ماتحرجنيش أكتر من كدة
لقد استغلت فينا ضعفنا نحن قاطني المكتب الذي لم تزره جونيلا قط ، واستطاعت تدبيسنا في كل مهام عملها بل وتدبيسنا في عزومات وخدمات مهنية وشخصية، وكل منا نحن المغفلون كان سعيدا بهذا باعتبار أنه تفضيل منها له..وعلى غرار فيلم الثلاثة يشتغلونها أصبح حالنا هو "هي تشتغل الثلاثي"... وطلعت بتخوني بتخوني يا عمو حسام
وداعا حلم العمر، فالتنزل ستائر المسرح على مشهد الاستغفال... وليبدأ مشهد الإنتقام


Wednesday, February 13, 2013

ارفع راسك فوق انت....مطلق


عزيزي المطلق المحبط ال فاكر ان طلاقك هيطفش البنات منك وانك أصبحت سكند هاند وسعرك مش زي الزيرو، أحب أقولك....أبسولوتلي، في فئة كبيرة جدا بتفضل اليوزد عن الزيرو...قول ليه؟؟

أقولك:
       - الراجل المطلق عاش قرف ونكد في حياته بما يكفي ويفيض، فمعندهوش رغبة ملحة في اعادة المشهد، وبيوجه كل مجهوداته عشان يعيش مبسوط وينجح الجوازة...وده مثبت في علم النفس، الرجل بيبذل مجهود أعلى لإنجاح الجوازة الثانية

   - في بنات بيدوروا على الخبرة في الأمور الحياتية ومين أحسن من ال جرب المشاكل عشان يتفاداها، بدل ما الواحد يدخل بغشومية وعشم زيادة في الجوازة  وفجأة كل أحلامه تتحطم على صخرة الواقع....عشان أقربلك النقطة دي، فكر تشتري عربية، أول حاجة بتعملها ايه؟؟؟ بتسأل حد ساقها عشان عارف مشكلاتها المحتملة وازاي تتفاداها أو تصلحها، هو كدة بالظبط.

 
      - الراجل المطلق ده لقطة، ده طول عمره مشافش يوم عدل، يعني لو بؤين حلوين كدة عالصبح ولا تسبيل حاد لمدة 5 دقايق ممكن يعيط من السعادة...دول غلابة يا  ضنايا وبيرضوا بقليله.

 
       - طول عمره هيفضل يعامل زوجته على إنها الهدية ال ربنا بيعوضه بيها عن الإبتلاء الأول...وهنا أحب أخاطب عزيزاتي الفتيات، أرجوكن ال ناوية تتجوز مطلق ماتخليهوش يعيش البلاء مرتين ويوصل ل مرحلة "احنا اسفين يا زوجة أولى"...حرام ده روح برضه، اكسبي فيه ثواب وكوني عاقلة

 
       - الرجل العادي طول الوقت عاوز يتجوز وخلاص عشان البنت ال بيحبها أو عشان يكون عنده أولاد أو لأسباب بيولوجية أو نفسية، المهم هيموت ويتجوز....أما المطلق أصلا مش عاوز، ف فكرة أنه ياخد الخطوة مرة تانية معناها إنه فعلا مقتنع بعد دراسة جدوى متقنة ورؤية مستقبلية تحليلية متأنية وعذاب وسهر ليالي ومراجعات واختبارات، انه شايف الموضوع ناجح بنسبة كبيرة، وده سر الخلطة لإنجاح الجريمة
 

طبعا لكل شيئ مساوئ ومميزات وأكبر مشكلة بتواجه الطرفين هي ان الراجل بيكون معقد شوية والبنت معندهاش وعي شويتين، بس كله بالحنية بيفك، شوية عقل كدة وهتمشي زي السكينة في الحيلاوة ان شاء الله

 
ولا أراكم الله طلاق في عزيز لديكم

 
شيماء سعد
11/2/2013

دليلك الشخصي للتفوق في قاعدة الصالونات

بما ان الرجل كائن بيحب يلخص ويجيب من الاخر على عكس المرأة ذات القدرات التحليلية وحب التفاصيل، فقررت أكتب "مانيوال" كدة على قدي من خلاصة خبرتي وخبرة بعض الزميلات، عن ازاي تعدي أول نزولة صالونات من غير ما تطلع منها مرفوض لأسباب تافهة ممكن الرجل ما ياخدش باله منها لكنها بتعلم في دماغ المرأة. اذن لديك قائمة الممنوعات الواجب تجنبها ال اطلقت عليها اسم قائمة "ابعد عن حيحا "
- حاول تبعد عن لبس الكلاسيك بزيادة، يعني البنت مننا أول ما تلاقي البدلة هلت عليها كدة بتقفل، بتحس نموذج عماد حمدي في أروع أفلامه مع سلوجان "مساء الخير يا نينة"....عادي جدا تنزل ب جينز وقميص أو تيشرت لطيفة وجزمة سبور، طبعا كله نضيف، ومكوي عند سيد بخة.. ومستحمي وحالق وضوافرنا مقصوصة، عاوزاك بتبرق كدة و"قسمة والشبراويشي" المعتق يطلع بأة ده وقته.
- تجنب الرغبة الملحة في فحص كل شبر في البنت، معلش انا عارفة ده أد ايه صعب عليك، بس تماسك وحاول انها ماتاخدش بالها عشان شعور معاينة البضاعة ده -بيليف مي- منفر جدا وبيعزز شعور الفتاه انها نازلة تتباع في سوق النخاسة. نعم؟؟ سمعتك على فكرة، أمال نازلة ليه؟؟ غالبا أمها غصبت عليها، مبسوط كدة؟
- ماتحكمش عليها من الأول لأنه أكيد حكم باطل ممكن يتغير في النقض "النزولة التانية أو بعد فترة في نفس النزولة".  بصوا بأة البنت من كتر توترها وشعورها ان في حكم هيصدر تجاه أنوثتها وجاذبيتها، أحيانا كتير بتدي رد فعل عكسي بيظهر أسوأ ما فيها أو بالأحرى أسوأ حاجات مش فيها، وبتتصرف كأحد حديثي التخرج من مستشفى العباسية، الحل في الموضوع ده "الكومبليمو ثم الكومبليمو" طمنها شوية، واديها ثقة بنفسها، فتبدأ تتكلم بحرية وده هيساعدك في انك تشوفها كويس...لأ يا قليل الأدب قصدي تشوف شخصيتها ال هتترازى بيها العمر كله....قول لها جملتين بلسم كدة ثناء على جمالها وشياكتها، انت اكيد عاكست بنات يا لمبي ما تستهبلش، ورينا الخبرة بأة بس أوعى تتغاشم وتقولها حاجة شبه "أموت أنا واعيد السنة" ولا "ماتيجي شمال ونجيب جمال" خفيف خفيف كدة  يا برنس.
- نيفر ايفر، شوف حسك عينك تتكلم في أمور مادية في أول قاعدة، الرجالة يموتوا في الأرقام، والبنات يكرهوها عمى، ممنوع منعا باتا ذكر أي أسعار لأي حاجة اشتريتها حديثا أو ناوي تشتريها مثلا لشقتك أو سعر الشقة ال هتعيشوا فيها "ده لو ربنا أراد للجريمة انها تكتمل يعني"...وده لييييه؟؟ عشان التفكير الحساس للفتاه بيترجم الكلام ده على انه مؤشرات قوية انك بخيل أو مادي أو سطحي...بدون الخوض في التفاصيل، هي دي سيكولوجية البنت.  
- ماتزنش كل شوية على انها تكمل العصير للاخر، قولها مرة كدة وفي التانية قول انتي شكل العصير ماعجبكيش، جارسون، شوف المازمازيل تطفح ايه....ماتتخضش هي مش هتطلب تاني، عيب عليك أنا هدبسك برضه؟؟ خلي في ثقة شوية بينا. وأوعى تاخدك الرومانسية وتكمله مكانها، معلش حصلت!! وكان الموقف غير لطيف بالمرة وفيه لمحة شك في كرم حضرتك. خليها في الخطوبة الحركات دي. وياريت لو تقدر تقوم تحاسب  من غير ما يشعروا قبل ما تنهوا القاعدة يبأة ذوق منك جدا..
طبعا دي قواعد عامة تطبق على كل المواقف، ويبقى ان لكل بنت تفكير سيكوباتي مختلف تقدر بيه تطلع القطط الفاطسة في حضرتك، وتترجم أفعالك التلقائية بريئة النية حسب رغاباتها، مقدرش أعديك من الأفخاخ دي والله، ذاكر كويس ولو في أي أسئلة، باب مجلتنا مفتوح، أهو نساعد الشوباب الغلابة وكله بثوابه...
ها قفلت من الجواز ولا لسة؟؟؟ الحمد لله، وهو ده بالضبط كان هدف المقالة.
 
شيماء سعد
30/1/2013


Wednesday, January 23, 2013

استقيموا يرحمكم الله


إن لم يكن الدين خلقا دميثا، ووجها طليقا ، وروحا سمحة، وجوارا رحبا، وسيرة جذابة فما يكون؟؟
الشيخ/ محمد الغزالي
 
كنت أتابع مثل الجميع أحداث الفزع الرهيب من ظهور ما يسمى بجماعة أو هيئة "الأمر بالمعروف والنهي عن المنكر"..تلك الفكرة
المعمول بها في السعودية والتي في رأيي المتواضع أثبتت فشل زريع في ردع ما يعتقد أنه فساد وفجر، بل بالعكس لأن كل ممنوع مرغوب فقد دفعت المجتمع للتعطش لكل ما هو محرم عليه..تلك الهيئة التي لا تهدف لاستقامة المجتمع بقدر ما تهتم بالحفاظ على
مظاهر التدين في المجتمع.
ليس لدي أي خوف من تلك الحركات ولست قلقة على الحريات الشخصية لأني مقتنعة أنه لا ولن توجد هيئة أو فرد لديه جرأة أو سلطة تخول له فرض ما لا يقبله الشعب المصري، ومن يخشى من الاسلاميين على حرياته الشخصية أحسبه مخطئ وقصير النظر...المسألة أعمق وأبعد من هذا في إعتقادي.
ولكن هذا لا ينفي ما أشعر به من ضيق لوجود هذا الفكر والاتجاه في بلدي..
:أولا لي سؤال لمن يتبنى هذا المشروع الهزلي في مصر
بم يستقيم المجتمع؟؟ هل بالالتزام بالزي الاسلامي؟؟ حتى وان أقررنا فرضا وجوبه بهذه الصورة!! أو بإطلاق اللحية؟ والالتزام بالسواك ؟؟ حتى وان أقررنا أن هذه العادة محببة!!... هل هكذا نقيم دولة الاسلام في نظر من يسمون أنفسهم اسلاميين؟؟
هل نزل القران الكريم في أول اياته اّمرا المسلمين بترك الخمر؟؟ ارتداء الحجاب؟؟ اعتزال الجواري وحياة الترف؟؟ طبعا لا، بل نزل بالاية الكريمة "اقرأ"..هل أمرنا باتباع أولي الأمر "في حال صلاحهم"!! والانسياق الأعمى لهم؟ أم نزل ب "وقل اعملوا" لأن كل انسان يحاسب عن نفسه وبعمله وحده؟؟ هل يعقل أن تغفلوا هذا المثل الذي يضربه لنا رب العالمين الذي هو سن الدين وشرعه؟؟ والذي له السلطة المطلقة والوحيدة لمحاسبة عباده لأنه المطلع الأوحد على الضمائر والأفئدة...
هل نرى في القران إلا الدعوة للعمل الصالح واقامة العدل واستقامة الضمير حتى يتحقق صلاح الدولة؟؟
لماذا نختار الطريق السهل طريق الفرض والأمر؟؟ لم لا نبدأ بالأصعب وهو اصلاح النفس؟؟التي هي الرادع الوحيد لنقاط ضعفها والمتحكم الأول في شهواتها...
يا من تريدون تطبيق الحدود والأمر والنهي وكأن الدين حكرا لكم لي سؤال اخر: هل ترون في مصر ما يحقق مبادئ الاسلام الحقيقية؟؟؟ كيف نسعى وراء تحقيق مظهر ديني ان لم يكن الجوهر طاهرا؟؟ كيف يعكس القبح الداخلي جمالا خارجيا؟؟ وكيف يطهر الجوهر وانت تعيش في بؤرة فساد؟؟ مستحيل...
هل تخلصنا من الافات الاجتماعية جميعها وفرغنا للمظاهر؟؟هل قضينا على الفساد المتوغل في كل شبر في مصر من رشوة
وسرقة، ثم استرددنا ما سرق منا، وحاسبنا من قتلوا ونهبوا، فالان نطالب بتطبيق الحدود؟!!
قل لي كيف تأتيك الجرأة لتطبيق حد السرقة على رجل سرق ليطعم زوجته وأولاده؟؟ كيف يأمرك ايمانك بتطبيق حد الزنا على من ارتضت أن تبيع نفسها من أجل أولادها؟؟ هذا ليس دفاعا عن كليهما، فكلاهما اثم، والله يعلم ما تسر الأنفس...ولكن بما أنك نصبت نفسك سلطة على العالمين، هل وفرت سبل الحياة الكريمة؟؟ هل قدمت البدائل لتلك المرأة ثم هي أقدمت على الإثم طواعية منها واصرارا فاستحقت العقاب؟؟ هل حاسبت نفسك على تقصيرك قبل الحكم على المذنب؟؟ وأخيرا هل علمت أن الله يسامح في حقه ولا يسامح في حق العبد؟!!
. أقم العدل وأصلح الضمير أولا...فلا يمكن أن تشيد صرحا عظيما على أرض غير مستوية، مهزوزة، رخوة
ان قمة الايمان تتحقق ليس حينما تختفي الفتن وانما حين تحيط بك من كل جانب ولا تلقي لها بالا، قانعا مقتنعا يملؤك ايمانك
هدوئا وسكينة، حيث تسمو بنفسك أن تخطئ ليس لوجود عقاب بل لأن هذا ما ترتضيه أنت لنفسك من القيم...
شيماء سعد
29/12/2011



صباح سكندري عاصف


كل نوة وانتوا طيبين..وانتوا عارفين نوة راس السنة دي أشد وأحلى نوة في السنة....
الساعة 7 الصبح..رافض تسمع صوت المنبه الكريه وهو بيصحيك بالعافية ناقص يسحب البطانية أو اللحاف من عليك، بس انت مش قادر تصحى لأنك طول الليل مانمتش من صوت الرعد والبرق والمطر قصدي "الشتا" اللي نازل يخبط في البلكونة..فتفضل صاحي وهاتك يا كاكاو وسحلب وما تيسر من الكابوتشينو وفي بعض البيوت المرفهة بيعملوا حاجات ب اختراع اسمه"فليفور" ومش عارف ايه...مابتعرفش غلطتك في كتر الشرب ده غير أما تحس انك لازم تقوم تعمل زيارة سريعة لمكان ما "وانت قاريني يا باشا"..انت متلج وأطرافك تكاد تسقط بس خلاص لا محيص، الكلى غالية برضه يا ناس زي الضنى بالظبط...وبعدها سلطان النوم غلبك فسحبت ساعتين كده...
قصره أديك صحيت على صوت رعد وكأن البيت هيتهد، وبدأت في طقوسك اليومية من أول مابصيت في المراية وانت بتغسل سنانك أو بتحلق "للرجال" أو وانت بتحاولي تظبطي الإعصار اللى طال شعرك بأي شكل عشان ماتأذيش الناس، حرام مالهمش ذنب. وتبدأ معاناة السكندري يا ولاد في مرحلة تغيير ملابسه، الفكرة نفسها تخليك تقشعر من البرد، والطبقات كتيير وكل طبقة بتشيلها، البرد يضحك عليك ويقولك تعالالي يا حلو..بعد الصراع ده تبدأ بأة تلبس...شرابااات، باديهاات...بلوفرااات...جاكتااات...ونقفل بكوفيات و جوانتيهات وطبعا تقفذ بال بوت..
تتشاهد وتاخد نفس عميييق وتفتح باب الشقة، وانت على أول سلمة تسمع صوت "يا فلاان اشرب بق ميه عشان متاخدش برد"..ترجع عشان ماتزعلش ست الحبايب وتشرب المية...وتوكلنا على الله...
تجري بخفة ودلع لحد عربيتك، مش نشاط منك يا خفة، ده عشان بحيرات المية اللي ما بين بيتك وعربيتك قربت توصل للركب، وتنط فالعربية وتبوس دريكسيونها عشان تدور وأخيرا صوت الموتور يعلى كأنه بيشتمك "ده جو تنزل فيه يا رخم؟؟"
طبعا الي بيسوق هتلاقيه بيتلكك عشان ياخد طريق الكورنيش، والمنظر كالاتي:
الساعة 8:30 الصبح، السما رصاصي غامق ومفيش نور، كله عامل انتظار وكأنها اشارة مدلولها "كلنا مش شايفين ف لو سلمنا مرايات أو بوسة في الرفرف، ماتتحمقش وخدها بروح رياضية بس لو خيشت هتبقي بروح *** حد من أفراد الأسرة الكريمة"... نفسك عامل بخار مية غير طبيعي كأنك في قهوة بلدي وفاضل صوت الكركرة – والأوبشن ده موجود في العربيات القديمة بس، هي بتكركر لوحدها – البحر عالي جدا، وأحيانا المية بتطول عربيتك، وانت مبسوط ومزاجك عالي عشان مشغل الراديو على "نص ساعة مع فيروز" ماهي بأت 9 الصبح...تبتدي تتوتر لأنك اتأخرت، مابدهاش بأة، اخواني السائقين مضطر أتغابى، اشمعنى أنا!! كسر يمين وشمال وطرطشة مية بأة "طبعا اقفل ازازك عشان متسمعش تحية السائقين ليك"، وبلاد تشيلنا وبلاد تحطنا والسكة طويييلة، وانت فيين يا مرزووووق؟!! وعادم الميكروباص اللي قدامك هبب الزجاج الأمامي، المساحات وقفت، مفيش مية يا ولداه في القربة!!! يعني ايه؟؟؟ أي سكندري في اللحظة دي هيفهم انه اتكتب عليه حاجة من اتنين:
  1. تلزق وشك في الزجاج الأمامي، أملا في انك تشوف مترين قدامك يظبتوك..ده لو انت قريب من الشغل خلاص.
  2. تركن على جنب وفوطك الحلوة واديها، هتطين منك بأة وتفضل تكافح لحد ما توصل لأفضل النتائج الممكنة.
وأخيرا يلوح أمامك ما يشبه مكان عملك...بسم الله نركن، بطل، قفل العربية.....
وحمدالله على سلامتك يا بطل...اتنيل اشتغل بأة وبلاش فيس بوك...حللوا الفلوس
وصباحك اسكندراني يا جميييييل ;)
شيماء سعد
2/1/2012

الحكمة التي لم أتعلمها

التعامل مع الناس صعب...من أصعب الأشياء في حياتنا...صحيح معرفة الناس كنوز ونعمة من عند الله لكن زي مانتوا عارفين "Nothing Comes For Free" ...

أنا ناس وانت ناس وهي ناس واحتكاكنا ببعض هو ما يكون مفهوم الحياة، لكن ما ينتج عن هذا الاحتكاك هو كم هائل من الأفكار والألم والتساؤل والحيرة...صعب...صعب جدا كمان..

أحيانا بتساءل لماذا لم يخلقنا الله فرادى؟!! يعني ال "ديفولت" بتاعنا يكون "سولو" والأوبشن يبقى "جروب"، بحيث يكون التوحد شيء طبيعي مايضايقش الانسان، لو تعب من اختلافات البشر..ياخد بريك لوحده بدون أي حرج أو شعور سلبي أو نظرة استغراب من المجتمع... اذا كان ربنا هيحاسبنا فرادى وهتسقط حتى الأنساب وقت الحساب، لم زرع فينا هذا الاحتياج النفسي للبشر؟؟

الأسئلة دي بسألها لأن في نوع من الناس بيرهقهم التغيير جدا ولا يكفوا عن محاولة اصلاح ما يطرأ على حياتهم من اختلاف وبالذات في العلاقات الانسانية، لكنهم بيكتشفوا فجأة مدى قلة حيلتهم ويذهلوا من كم الوقت والمجهود المبذول عالفاضي ناهيك عن الارهاق النفسي...لكن الرغبة الملحة في الاصلاح دائما ما تغلب على تفكيرهم وتستطيع طرد المنطق في سبيل نجاحها.

هاديك مثال مادي: طبقك المفضل اتكسر (أصل أنا عندي طبق مفضل معلش استحملني)، وانت مرتبط نفسيا بيه، هتحاول تصلحه بكل ما أوتيت من قوة عشان تحتفظ بيه. وممكن يتصلح بالصورة الي تجعله صالح للإستخدام، لكن عمره ما هيبهجك ويسعدك زي ما كان..عمره ما هيبقى هو..هو أصبح ذكرى..ووجوده أصبح صورة مشوهة لذكرى جميلة يؤلمك رؤيتها...لكنك ترفض التخلي عنه.

وطبعا بالقياس على البشر، ربنا بيمن عليك بنعمة التعارف زي ما قال في القران الكريم "وجعلناكم شعوبا وقبائل لتعارفوا"... والعلاقات الانسانية زي الطبق كدة لما تشوفه وتنبهر بجماله وتحب تقتنيه، ثم ترتبط نفسيا أو عاطفيا به، وفجأة الوضع يختلف وتشوف شروخ وتصدعات بدأت تظهر عليه بعد فترة... ترفض تبدل الحال، وتصر على الاصلاح، وتقاوم، وتسامح، وتعمل نفسك مش اخد بالك، وتجيب خبراء اصلاح عشان يلملموا أجزاءه تماما كما كان، عشان يرجعولك طبقك اللي بتحبه هو نفسه أو جايز احساسك بيه زي ما كان..ايوة هو احساسك بيه دي...لكن هيهات.

الغلطة عندك انت، انت الي مش متقبل التغيير، ومتعلق بذكري مضيئة، زي النجمة، شايف نورها بس هي فنت واتحرقت من زمان وليس لها وجود مادي ملموس.

غلطتك انت وماتلومش حد على اكتئابك، لأنك مش متقبل فكرة ان اليأس أحيانا يكون عين الحكمة...لم تعرف متى تتوقف...غلطتك انك عنيد ومابتستسلمش، مش بتتقبل الهزيمة من الواقع وقلة حيلتك أمام القدر.

الحقيقة هي أن التغيير سمة بشرية أصيلة.. زي ما بيقول عمنا جاهين "لا تجبر الإنسان ولا تخيّره. يكفيه ما فيه من عقل بيحيّره. اللي النهارده بيطلبه ويشتهيه. هو اللي بكره ح يشتهي يغيّره.
عجبي"...




شيماء سعد
29/01/2012

نصائح تهمك...أو ماتهمكش أي دونت كير


من مشاهداتي اليومية:
المرة دي أنا بكتب للتحذير...وقد أعذر من أنذر، بحاول أشرح للسائرون نياما..ال هم المشاه ازاي السائق بيشوفهم...هعرض نماذج بنشوفها كل يوم تحرق الدم (لو انت من اخواني السائقين)...
1. مرفت وعيلاء: طبعا دول ال بيتمشوا ف نص الشارع ولا كأنهم في نزهة خلوية...الواد الجن عاوز يعمل منظر طبعا ف يقوم مشاور بإيده للعربيات تقولش الريس...-أيام ما كان عندنا ريس-، وبكل ألاطة يتوقع ان المرور- لأ الكون كله - هيستجيب لإشارته متفهمش ليه!!....تيجي انت تهدي عشان تعديه، واجب وشهامة منك..تلاقيه بيبصلك نظرة انتصار لا تخلو من بعض الشماته، وال " بانانا" ال معاه تحس انها مع هيرو بأة وممكن ترقع زغروتة ف نص الشارع مع تسبيل وبربشة كتير...
- ده حله ايه؟ انك تديه بالرفرف واحدة كدة تفكره بحجمه
2. الأب: نموذج الأب ال هو راجل كبير وغالبا ناصري..تلاقيه لسه جو الثورة مسيطر على تفكيره وشايف ان كل من هو دون ال 60 سنة دول شوية عيال متسرعين وتافهين...وبيتوقع انك لو ماعدتهوش هيمدك على رجليك أو يربطك في الفلكة، وغالبا هيلم عليك الناس ويديلك درس في احترام الكبير والتأني مع استعادة بعض ذكرياته في الحزب الاشتراكي، وممكن يختم كلامه بقرصة ودن..
- ده حله ايه؟؟ انك تحاول تعديه وانت ساكت وماتبينش أي علامات استياء أحسن يفرش في الأرض ويقولك وريني هتعدي ازاي...اه خلي بالك الجيل ده لبط قوي، عشان لو انت متأخر وده غالبا، فإنسى معادك...وأهو زي والدك اكسب فيه ثواب ومتأوحش كتير..
3. القطة: طبعا مش محتاجة شرح...الفتاة القطة، شايفة نفسها وبريستيجها مايسمحلهاش تجري بسرعة عشان عربية، نظام أنا مبتهددشش. وممكن كمان يكون ال سايق شاب ظريف ف مفيش مانع انها تهدي قدام عربيته وربنا يسهل ، يا يخبطها، وهنا في فرصة كبيرة انها تستهبل ويغمن عليها وتقوله وصلني والله المستعان، أو السيناريو الأكثر انتشارا انه يطلع زوق ويضرب فرامل فيلبس في ال وراه و يتشتم فيشتمها وتتكسر كل أحلامها على أكسيدام الواقع J
- حلها ايه دي؟ ادعيلها بالهداية... بس هي لو اتخبطت مرة هتحرم، وممكن تكون انت الانسان الشهم ال هيقدم الخدمة دي للمجتمع ويخبطها. بس لو لبست جوازة ماعرفكش...
4.المتردد: ده أكتر نموذج بيعصبني...ليه؟ لأنه بالنسبة للسائق هدف متحرك ، خاصة لو انت رايح الشغل الصبح و اكلينيكيا نايم وأكيد متأخر. وصورة ال "اتش أر" قدامك عالطريق مستنيك ب خصم محترم، ف انت بتحاول تعدي أي حاجة قدامك عشان ماتقابلش الوحش في اخر مرحلة..ودي أخرت لعب ال بلاي ستيشن.
- حله ايه؟؟ ما تاخدكش بيه أي شفقة...ده عنده مشكلة نفسية، اعمل فيه معروف واخبطه برضه عشان يتعلم ياخد قرارات سريعة وحاسمة...يا يطلع قدام يا يتنيل يقف لحد ما حد كبير يعديه. صدقني هيدعيلك لما يدرك الخدمة ال قدمتهاله...معرفش هيدركها امتى أو هيلحق يعيش عشان يدركها ولا لأ...
أخيرا وليس اخرا...لي استفسار لك عزيزي السائر...
منين جبت كل الثقة دي في فرامل العربية؟؟ أو في قدرات السائق؟؟ أو مزاجه؟؟ أنا شخصيا بكسل أفرمل أيوة أنا مانيوال يعني الفرامل مجهود برضه ويترتب عليها تغيير نقلات ووجع دماغ.
انما السؤال الملح بأة، منين جبت روح الإستنطاع دي كلها؟!!!
شير في الخير، ولك الأجر والثواب
 
شيماء سعد
3/4/2012

فقدان شهية

أمر بحالة غريبة هذه الأيام...لا أستطيع ايجاد مسببات واضحة لها فقررت أن أصفها علَها تجد صدي لديكم..أو ربما يتصادف مرور أحدكم
بهذا النوع من...كيف أصفها بالكلمات؟؟ هي حالة أقرب ما تكون ل"فقدان الشهية"
فقدان الشهية لأي شيء..فلا شيء يرضيني أو يسعدني، ضحكاتي لا تدوم طويلا ولحظات السعادة الصادقة التي أستطيع انتزاعها تخبو بسرعة فائقة لأعود الى سكوني وتفكيري العميق، أشاهد كثيرا، أسمع كثيرا ولكن لا أريد التعليق أو التعبير عن أي رأي، لست مكتئبة بتاتا، ولا مهمومة، فقط لا شيء يثير فضولي أو يسترعي اهتمامي، ما عاد لدي شيء أنتظره بفارغ الصبر، أشكر الله كثيرا في كل لحظة على ما أغدق علي من نعم لا تعد ولا تحصى، ولكن هناك عنصر ما توارى من حياتي لفترة ليست بقصيرة، أفتقد التوق لحدث ما حتى ولو بسيط ومتواضع..أفتقد اهتمامي وشغفي الطفولي بشيء ما، فكل الأحداث تتساوى بنظري ليس لأحدها ثقل عن الاخر، حدثت أم لم تحدث لا أبالي...لا أتذمر إطلاقا من هذا الهدوء ولا أدعي أنه يضايقني، بالعكس ربما هو نوع من النضج الفكري أو الزهد- "استبعد الأخير قليلا"- لم أسعى له، ولكن أحاول فقط تحليله.
بت أتعجب من تفضيلي الهدوء والمشاهدة على التفاعل، وليس لدي أدنى فكرة ان كانت هذه الحالة هي عين الصواب أو مجرد فترة عابرة مضمونها احتياج الشخص للإختلاف والنقيض...ترى هو ما يحدث حولنا من أحداث متلاحقة يجعلنا لا نجد الوقت للتفكير بأنفسنا؟ أو ما نتعرض له من كم هائل من تناقضات فكرية واجتماعية وتوجهات دينية وسياسية أفقدتنا القدرة على التعبير وتحديد ما نريد بشكل صريح لا لبس فيه؟ بل وجعلتنا نعيد النظر في كل الثوابت الراسخة بأذهاننا، الصواب والخطأ، الخير والشر، ربما صدمة أن كلاهما نسبي وليس مطلق تجعل اختيارتنا أصعب فأصعب أم السبب هو تكرار الأحداث الغير مفهومة والتي لا يوجد لها تفسير منطقي أنتجت شعور بعدم الاستقرار الفكري "شعور انك مضروب في الخلاط، مش فاهم ومش لاحق تفهم ومفيش معطيات كافية تخليك تفهم" ..
ربما هو الاحتياج لشيء ما لا أفهمه قادر على اعادة التوازن و بث الحياة ؟!!
هل السبب واحد أم هي نتاج أسباب مختلفة؟يمكن أن يكون السبب هو المرور بالكثير في وقت قليل، نعم أعتقد أن احتكاك الشخص بالكثير من المتناقضات في وقت قصير قد يفقده الشهية والشغف في معرفة المزيد كأنه نوع من استهلاك المشاعر أو استنزافها مثل من يأكل سريعا ليتذوق من كل الأصناف ثم يصاب بالتخمة وينتهي به المطاف ب "فقدان الشهية"!!...قد أكون مخطئة وقد أصيب، ولكن في النهاية...
تلك هي الحالة، كما وصفها الشاعر محمود درويش
"لا شيء يرضيني" فهل من تحليل!!
شيماء سعد
12/05/2012

أخلاقنا...على فين!!


لاحظت في الفترة الأخيرة انتشار لهجة السخرية والتريقة على كل حاجة وأي حاجة، بحق ومن غير حق، أنا متفهمة ان الطبيعة الساخرة دي ناتجة عن جين مصري أصيل، وبحبها جدا بالتحديد في ما يخص السياسة، لكن كله في حدود، يعني لازم يكون في وازع أخلاقي يوقفنا عند حد معين من التريقة، واكيد الحد ده هو جرح مشاعر الاخرين.
أكثر ما استفزني بخصوص الموضوع ده هو الكوميكس أو الكاريكاتير ال بيتريق على بعض الأمراض المزمنة، مش عاوزة أوصفلكم شعوري لما قريت لأكثر من مرة دعابات سخيفة عن مرضى الزهايمر ومرة واحد عنده زهايمر نسي ي...-ومش عاوزة أعيد ذكرها لأني رافضاها قلبا وقالبا-، وكأن الناس فقدت حس الأدب وفقدت التمييز بين المسموح والغير مسموح، بمعنى اخر بين الظرف وقلة الأدب. مش عارفة ازاي وصلنا للوضع ده!!!
لو الناس تعرف مدى الألم ال بيمر بيه أهل وأصدقاء مريض الزهايمر، ومعاناتهم في تقبل الأمر أساسا، لو يعرفوا مدى الأذى ال ممكن يتسبب فيه كوميكس زي دي، وكمان ان سعادتك بتضحك عليها وشايفها "فاني قوي" !!! لو في ايدي أحط قانون يجرم الكوميكس والتعليقات دي ماكنتش هتردد.
يا ريت كل واحد فينا قبل مل يقول النكتة ال هتخليه محبوب وسط أصحابه، يفكر مردودها ممكن يكون ايه في نفس واحد قاعد معاكم وانت مش حاسس بيه. قبل ما تحكي عن فلان ال مات من السرطان وتقول ببرود اه يا عم ماهو محدش بيخف منه، أو طالما دخل الجسم خلاص، أو..أو... افتكر ان ممكن يكون واحد قاعد عنده أمل كبير في ربنا يشفي حد من أهله، ويمكن هو نفسه وانت ماتعرفش.
قبل ما تتريق على واحدة لابسة ملخبط وفاكرة نفسها شيك، ولا واحدة تخينة قوي فكر ان الظروف دي مش ب ايدهم، بس من حقهم يتبسطوا بدون ما سعادتك تبصلهم بنظرة استعلاء تحسسهم بكل ابتلاءاتهم لمجرد ان ربنا رحمك مما ابتلى به غيرك، والفضل مش ليك ولا بشطارتك، دي ارادة ربنا.
ده مش معناه اننا ماننقدش، لكن ننقد الفكرة، الفعل مش الشخصية، انتقد أفعال الرئيس براحتك، لكن ماتقولش مراته هتعرنا بلبسها، انتقد نفسك واضحك عليها براحتك، انتقد اعلان مستفز بس مالكش دعوة ب أخلاق الموديل، انتقد أعمال الهام شاهين وأدوارها التافهة، لكن ماتقولش عليها زانية.
كفاية لا مبالاة وياريت شوية تركيز في كلامنا ومراعاة لشعور الاخرين، والكلام ده لنفسي قبل ما يكون لأي حد تاني
وشكرا لسعة صدركم
شيماء سعد
2/9/2012

مش هتجوز


لا مش مجنونة ولا بكدب... ايه؟؟ لا والله مفيش حاجة معقداني، ولا عندي مرض معدي، لا لا الحمد لله ال "أي كيو" كويس مفيش اي نوع من التأخر الذهني
كل ما هنالك اني شايفة ان طبيعي جدا ان تختلف مع منظومة غلط، حتى لو نشأت فيها ومتعود عليها، المسألة في نظري عبارة عن ترتيب أولويات، محدش بيكسب كل حاجة،
لكن هتخسر ايه، دي بأة كل واحد يحددها لنفسه، وبالنسبالي خسارة جنة الله في الأرض زي ما بيحاولوا يصوروهالنا في كلمة جواز، هي أهون من خسارة نفسي بكتيييير،
فقررت إني مش هتجوز في اطار المنظومة دي واليكم أسباب القرار الجمهوري وال هي نفس الأسباب ال الناس بتتجوز عشانها
 
ملحوظة: المقال يحتوي على مواد سامة ومتفجرة ، لو عندك حساسية من الصراحة أو البجاحة اقفل وخلينا أصحاب
 
1.مش هتجوز عشان أكون حاملة اللقب، ما دايم الا وجه الله، القاب بتروح والقاب بتيجي والدنيا غرورة يا زداحمد المتغطي بيها عريان.
2.مش هتجوز عشان المجتمع حابب صورة ال "كوبل" أكتر من "السينجل."
3.مش هتجوز عشان المجتمع شايف الجواز انتصار للفتاه على مثيلاتها أو على ظروف اجتماعية معينة، انا ال أحدد ايه الانتصار أو الفشل بالنسبالي لأنها يوم ما هتضلم هتعك على دماغي لوحدي مش على دماغ المجتمع ال حاشر نفسه ف كل حاجة.
4.مش هتجوز عشان واحد محترم أو والدته أو جارته أو صاحبته شايفاني مطابقة للمواصفات القياسية اللوذعية أيزو أخر حاجة في نظر المحترم.
5.مش هتجوز عشان أكون مجرد ترس في منظومة متخلفة، ايوة احنا في مجتمعنا 95% من الرجال اتربوا بطريقة غير صالحة للزواج في العصر الحديث"اعتبر نفسك من ال 5% ولا تضايق نفسك"، وده بيسبب صدمة للبنت ال فاكرة انها هتتجوز حمادة ال معاها في الجامعة ذو الطابع ال فري متفتح الذهن، ولما تيجي تتجوز، أيبك اللطيف الطيب بيتحول ل أقطاي والسنيورة المفروض تتكيف فجأة.
6.مش هتجوز عشان أفرح أهلي "انا اسفة والله"، ده اكتر سبب محترم في الخماشر سبب دول بس ربنا وهبلنا مخ، مينفعش أبسطهم يوم وأعكنن عليهم طول العمرلأنهم أول طرف هيشيل الهم لو انا مش مرتاحة.
7.مش هتجوز عشان ييجي شخص بالكاد يعرف عني أي شيء، ويحسسني ان مجرد وجوده هينتشلني من براثن العار والفضيحة..مجرد بس وجوده هبة الهية المفروض أقضي عمري كله أرد له الجميل ده...اه والله ده احنا جاحدين قوي.
8.مش هتجوز "ودي بأة تلات أرباع البنات بيقعوا فيها"، عشان أعمل فرح والبس الفستان الأبيض، خلينا صرحاء، الفرح حلو مفيش كلام على رأي زرزور، بس وبعدين؟؟ لو ال جاي مش محسوب صح ابقي خلي الفستان ينفعك، وسمعني سلام وتفيد ب ايه يا ندم يا ندم.
9.مش هتجوز عشان أخلف، أوبشن الكفالة موجود وأهو بثوابه. انما اجيب طفل ينشأ بين أبوين غير متفاهمين ويطلع معقد يبأة قلته أحسن والبلد مش ناقصة عاهات.
10.مش هتجوز عشان حد يونسني لما أكبر، أولا الأعمار بيد الله، ثم لو على الونس فقطتي كفاءة تشغل بلد وروتانا سينما مش هتقدر تغمض عينيك، وال "وي" وال كتب والجيم والسفر والكافيهات "مايتعيبوش، ومالهمش طلبات ومش ممكن يعكننوا عليا أبدا.
11.وأكييييد مش هتجوز عشان حد يصرف عليا ولا يشيل مسؤوليتي...بلا خيبة العكس هو ال بيحصل.
12.مش هتجوز عشان سنة الحياة ونص ديني وكدة، ماهو ممكن النص التاني ي....يخسرني النص ال كان موجود قبله.
من الاخر كدة كل دي أسباب واهية ومؤقتة وليها حلول بديلة من غير ما اخد ريسك الجواز...طب أتجوز ليه؟
  
انا بنت طبيعية جدا ومش كارهة الجواز في حد ذاته انما كارهة نظرة المجتمع ليه وكارهة الأسباب ال بتدفع الشباب والفتيات للجواز، ومش هقبل يكون أحد الأسباب دي عامل أساسي في تدبيسي في حياة تعيسة، أو حياة أقل مما أرتضيها لنفسي.
 
ببساطة هتجوز لما يكون مفيش سبب،...لما أقول انا اخترت فلان الفلاني عشان.....ومعرفش أحط كلمة بعد عشان، ولا يكون فارق معايا أصلا ال بعد عشان...لما ماتكونش حسبة معقدة أو صفقة بيحاول كل طرف فيها انه يحصل على امتيازات أكتر، هتجوز لما أكون مبسوطة بدون ابداء أسباب
 
وحتى تحدث تلك المعجزة أنا ناوية أستمتع بحياتي وأستغل كل فيمتو ثانية فيها على مزاجي
شيماء سعد
17/10/2012

اوباما والحلم المصري

بعد اعلان نتيجة انتخابات الرئاسة الأمريكية وجدت أغلب أصدقائي منقسمين الى فريقين، الأول يعبر عن فرحة غامرة ويكاد يبعث ببرقية تهنئة للرئيس أوباما لانتصاره على منافسه الشرس رومني، والفريق الاخر بدأ يشتم في أوباما و في ال فرحانين بيه"
احترت قليلا في تفسير الموقفين، فكلاهما غير منطقي، ولكن في رأيي هناك بعد نفسي أكثر منه سياسي لتفسير الموقفين
أما الفريق الأول، فريق "القرعة تتباهى بشعر بنت اختها" وهو الفريق ال تقريبا بكى خلال خطاب أوباما، وكان بداخله شعور ياريتني كنت معاهم الأبطال، فتلك الفرحة انما هي انعكاس لإحباط داخلي كبير عند كل مصري كان نفسه يعيش لحظة مشابهة، كان نفسه يختار من غير ما يعصر لمونة، ده لو اختار اصلا، كان نفسه يحس انه اختار الصح لبلده، وعنده يقين ان القادم أحسن، كان نفسه يشعر ان رئيس بلده متحضر وحاسس بيه فعلا مش قولا و كان نفسه يفخر بخطابه زي الأمريكان كدة بالضبط النهاردة. ودي مش مقارنة - حاش وكلا- احنا ابعد من ان نوضع بتلك المقارنة لسة..لسة كتيير..بس الفكرة ان الفريق ده بدأ يعيش احلام الغير لما أحلامهم تكسرت على صخرة الواقع.
الفريق الثاني، فريق"أعداء النجاح"، أشكال قاسم السماوي كدة وده فريق محبط أيضا بس من كتر احباطه مش قادر أو مش عاوز يشوف أي حاجة في الدنيا عدلة...فيبدأ ينشر بلاوي أوباما على غرار، هو ده ال انتوا فرحانين بيه؟؟ يا سذج. مع ان أي حد متابع الانتخابات دي بقدر بسيط هيفهم ان أوباما هو الاختيار الأحسن بكل المقاييس، ولكن هيهاااات احنا ثورتنا باظت والدنيا ضلمت و"مفيش فايدة يا صفية" ف أنا هحارب أي بارقة أمل في أي مكان في العالم وال هيفكر يتفاءل في مصر هنسفه وهنسف فكرته عن أي جميل...
طبعا هناك دائما الفريق المعتدل، المدرك للحقائق بوضوح، والصامت في أغلب الأحيان....من الإحباط برضه
بس الحمد لله كل هذا اللغط انتهى في لحظة، وبقرار حكيم أصدره النائب العام المصري، ألا وهو منع المواقع الاباحية، وبهذا تعود الأخبار المصرية للصدارة وينتهي الحلم الأمريكي من صفحات التواصل الاجتماعي.......تشكر يا عبمجيد،
شيماء سعد
7/11/2012

مواطنون بدرجة رهائن


هذه بلاد لم تعد كبلادي......هذا بالضبط شعوري، والذي لم يجل يوما بخاطري أن أنتهي اليه. أنا من حاربت يوما فكرة الهجرة من أجل حياة أفضل ووقفت أمام السفر للخليج من أجل المال، أنا من تمسكت بحلم البناء في بلدي وأيقنت تماما أنها تحتاج الكفاءات من أبناءها...أين تلك الأفكار مني الان؟؟ بعيدة جدا، لم يعد لها أصل في نفسي ولا إيمان...بت محاصرة بشعور الرهينة، نعم أنا مواطن بدرجة رهينة. دعني أحاول وصف هذا الشعور لك، ولا أعلم ان كانت الكلمات تطيق هذا المعنى!!
مواطن بدرجة رهينة تعني أن إقامتك جبرية، ولو كان الأمر بيدك لما ترددت عن الرحيل ولا ندمت عليه لحظة
يعني أنك عرضة للقتل دائما لأسباب ليس لك بها علم و قضية ليست قضيتك وفي توقيت يحدده اخرون
شعور الكراهة دائما وسلب الإرادة والاضطرار لمواجهة مصير مجهول يتخذ أشكال مخيفة كلما حاولت استبيان ملامحه
أن يمر شريط حياتك أمام عينيك ويتوقف عند اللحظة الحالية
أن تنتحر الأحلام ويحترق المستقبل ويتلاشى الأمل
ان تصبح حاجاتك الأساسية ومقومات النفسية المتزنة، رفاهية أو درب من الخيال...ولكنك مجبر على الاستمرار كيفما يفرض الواقع ويملي اخرون عليك الشروط
أن ترى أخيك يقتل امام عينيك ليفديك بدمه، وتدرك أنك مرشح لنفس الدور دائما
مواطن بدرجة رهينة يعني شعور بالعجز واليأس والاضطراب في كل لحظة
تساءلت مرارا أين اختفى الجمال؟ لم هجر مواضعه وفر هاربا ؟ كيف ضاع وهو توقيع الله في الكون؟
كان دائما هناك يحيط بي من كل جانب، اراه بعيني وألمسه بروحي، وأتنفسه مع هواء البحر المحمل برائحة اليود ...أشاطره مع من أحب فيصير حتى أجمل وأبهى.
هنا أمضيت طفولتي، واتذكر فرحة والديً الغامرة بإنجازاتي الصغيرة .... وهناك جلست مع صديقتي المقربة لأستمع إلى بداية قصة الحب التي كللت بالزواج، وفي تلك الزاوية رأيته لأول مرة ولمحت بعينيه تلك النظرة التي نثرت الورود والفراشات في دنياي، وأصبغت الحياة بلون الورد، وفي هذه الحديقة أمضيت أجمل لحظاتي مع رفقاء الجامعة
أمر بنفس الأماكن ولكنها أصبحت منزوعة البهجة، مصمتة ، جماد، بعد أن كانت تنطق بالسعادة
وكأنني مررت بزلزال عنيف حرك الأرض الثابتة من تحت قدميً، وانهارت صورة العالم المحيط، ولن تعود لسابق عهدها أبدا
لا ثوابت..لا ثقة...لا مطلق.
ولكني سأصحو كل يوم طالما قدر الله لي الاستمرار، وسأخوض الصراع، سأقرأ كتبي المفضلة علها تنقلني الى عالم أفضل، سأستمع الى موسيقاي العذبة وأدع صوت فيروز يحملني الى دنيا الخيال، ترسم لي قصة الحب التي بخيالي..سأحتسي قهوتي مهما ازدادت المرارة في مذاقها، وليذهب العالم للجحيم، تلك هي لحظات السعادة المتبقية التي أستطيع انتزاعها من الحاضر ولن أتنازل عنها أبدا...
شيماء سعد
13.12.2012

قاعدة صالونات


ماشاء الله الواحد  بعد العمر ده والخبرات المتعددة في نزولات الصالونات اللزجة  أصبح عنده جهاز رادار وهو في أي مكان يقدر يحدد المنظر ال هناك ده قاعدة جوازة ولا لأ واحتمال يقرا أفكار كل واحد في القاعدة من نظراته...
تعالوا نتفرج على الفيلم البايخ ال اسمه قاعدة صالونات ده يمكن ننقذ روح بريئة من تجربة مماثلة
مشهد 1 ليل داخلي،  كافيه يتميز بالهدوء والسكينة : 4 أفراد على ترابيزة متطرفة كل اتنين بيكلموا بعض، أول اتنين هم شاب وفتاة والتانيين أمهاتهم طبعا...
الفتاه: باصة في الأرض على طول كأن في حوار جاد بينها وبين السجادة أو كأن ال قدامها عورة عيب تبصله...يقولوا ايه البنت وشها مكشوف وبتاعة رجالة؟؟؟ تبأة تبصله بعد كتب الكتاب مفيش مانع...طبعا راسمة ابتسامة كاوتش كدة طول القاعدة لا منها ضحكة على مقولة ظريفة أو قفشة ولا منها مريحة بقها في الوضع الطبيعي، غالبا البنت بتروح البيت ب شد عضلي في الوجه وبتاخد وضع البوز 3 أيام بعدها
طبعا من منظر البنت، تفتكر انها مبسوطة ومنبهرة وحابة الشاب ومندمجة جدا في الحوار، لكن في الواقع لسان حالها بيقول عبارات من أمثال "عدي يا ليلة"..."انت باصص فين يا حيوان" !!!! وعلى احسن تقدير بتقول "يلا هي موتة ولا أكتر"...
طبعا ماننساش ان البنت استحالة تجرح شفايفها النونو وتقرب من كوباية العصير...يقولوا علينا ايه جعانين ولا نازلين نتعزم؟؟!!!
الشاب: وده بيطلع ب 3 مناظر على مدار فترة النزولة، أول نص ساعة بيقوم بدور ال سكانر، بيمسح البنت من فوق لتحت ويمين وشمال و وان توعشان يطمن هي مطابقة لل أيزو والمواصفات اللوزعية ال موصي عليها مامي ولا لأ!
النص ساعة التانية بيقوم بدور الانترفيوير، يبدأ يسأل بحنكة مبهرة وذكاء منقطع النظير أسئلة من برة المنهج من عينة...قوليلي يا بنت يا تهاني هل تسشورين شعرك؟؟ هل ترتدين ال لينسيز؟؟ وهي ترد : ربااااااني
لأ بجد في اسئلة كدة مفقوسة قوي ومالهاش اي تلاتين لازمة زي: ليكي أصحاب ولاد؟؟!! طب والنبي ترد تقولك ايه؟ ماهي يا تجاوب بالواقع الطبيعي لأنها بنت طبيعية ان "اه"، وساعتها هتقلب وشك وتحسسها ان امها معرفتش تربي، وفورا هرمون التستوسترون هيدي اشارات للمخ انك تحمر غضبا ويطلعلك شنب فجأة وتنزل صورتك على ازازة البيريل، وترد بال كليشيه المشهور "مفيش راجل بعد الجواز هيقبل بالوضع ده" وضع مخزي صحيح قلة ادب، بنات بجحة ناقصة رباية!!!
 أو هتكدب ووشها يحمر وتقول ولاد؟؟ ولاد يعني ايه؟؟ ماميييي انتي ازاي خبيتي عليا طول الفترة دي ان في مخلوقات تانية عايشة معانا في ال كوكو ده!!!!  والمصيبة انك تصدق وتتبسط J هم الرجالة كدة يحبوا ال يشتغلهم J
اخر منظر بيطلع بيه الشاب في رحلة العذاب دي هو دور قاضي القضاه، أول مايروح يبدأ حكمه على المتهمين ال كانوا ماثلين أمامه من شوية  ويبني رأي واثق على أرض صلبه بناء على الفترة الزمنية الطويلة ال عرفهم فيها...
ملحوظة: الفقرة دي بطولة جماعية بمعنى ان كل الأطراف "الأسرتين" بتنفذه بمجرد الخلاص من النزولة...
وأخيرا أدوار الكومبارس الصامت: والدة كلا من الشاب والفتاه، بيظهروا في التترالأول مع ابتهالات وأدعية لنجاح الفيلم، وينتهوا ب مارشات عسكرية ، بمعنى انهم بيقوموا يفسحوا الكلاب عشان العصافير ياخدوا راحتهم...
ده كدة ال ستيريو تايب بتاع أغلب النزولات لكن النوادر والمواقف والطرائف بأة بتاعة كل نزولة دي عاوزالها  كتاب لوحدها J
 
شيماء سعد
22/1/2013

Saturday, October 17, 2009

عندما اختفى المعنى...يا معلم


كان يامكان، كان في زماااان زمان لغة جميلة وجليلة، إسمها...اللغة العربية...ظلت معانيها لعصور طويلة..صادقة وقوية...لكن اجيال ورا اجيال ذهبت الى الزواال واتبدل الحال بالحال على يد الأشبال...

أبدأ منين؟؟ أقول إيه؟؟
ترددت كثيرا قبل كتابة هذا المقال لأني لا أزعم مطلقا أني سيبويه عصري في اللغة العربية ولا استثني حالي من مشاركتي الفعالة ومساهمتي القوية في اضمحلال اللغة مثل أغلب الشباب والفتيات من جيلي، لكني قررت أخيراً البحث في ظاهرة فقدان الكلمة لمعناها...
كانت البداية عندما قررت أنا وبعض الأصدقاء بدء لعبة سويا تنص على الالتزام بالكلام باللغة العربية الفصحى(هي الفصحى ولا الفصحة صحيح؟؟) لمدة 15 دقيقة وكانت النتيجة.. إحم...لم ينجح أحد، اذن 10 دقائق...طيب وحياة ال 15 سنة مدارس وجامعات 5 دقائق بس نكمل من غير كلمات أجنبية وبلغة سليمة (وسليمة دي تحتها ألف خط) وشعرنا بالمعاناة، وبضيق أجنبي يتعلم اللغة ويحاول تجميع الكلمات من هنا وهناك وربنا يسهل. وجدت أن اختيارنا للكلمات انحصر في نطاق أو مستوى طفل في العاشرة من عمره وأن الجمل التي نستخدمها تتلخص في الاتي وركزوا في الاتي ده وراجعوا كلامنا كده:


3أو 4 كلمات عربي على لغات مختلفة (الكثير من اللغات المختلفة في الواقع) والباقى هو مفردات مجاملة فارغة من المعنى، ليس لها محل من الإعراب ولا هدف فى السياق، تقدر تقول عالة على الجملة. طيب أنا مش ضد استعارة كلمات اجنبية اذا كنت عارف تتكلم بلغتك بصورة مشرفة وموضوع الإستعارة وضعف اللغة ده قتل بحثا، انا واقفة دلوقت على الكلمات التي فقدت معناها بسبب استهلاكها عالفاضي ومش المليان. خذ ابسط جملة نستخدمها يوميا وقارن معايا كيف كانت وكيف أصبحت (مع إن كانت وأصبحت اخوات بس شتااان في النتيجة).
زمان: صباح الخير يا منى (مين منى دي؟ ما علينا) أو صباح الخير يا أحمد.
الان: هااااييي يا كوكو ازيك يا جميلة؟ صباح الفل يا قمر واحشاني يا بطة والله.(دول بنات طبعا واضحة) ومرة أخرى لا أنقض أحد ولا استثني نفسي.
أما بالنسبة للسادة الرجال فتتحول الجملة الى: عمي وعم الشباااب صبح يا مااان صباحو بيضحك يا كبيييير.سلام يا معلم..(على فكرة ال spelling&grammer checker بيقولي يستحسن إعادة صياغة هذه الجملة..أحرجني!).
وهكذا سلسلة من العبارات الغير موظفة في السياق. من أين أتت كل هذه العبارلت وكيف اقتحمت كلامنا ولماذا؟ هي ليست دلالة على المحبة والغلاوة هم يعني زمان كانوا بيكرهوا بعض؟!!
النهاردة لو حد ناداك بإسمك كده فقط "تعالى يا محمد عاوزك" أكيد هتقول أنه زعلان منك أو عاوز يعاتبك على موقف ما، وياسلام لو كان ده مديرك يبقى يا ليلة سودة.
طيب حد يحاول يفكر ويحل معايا الأسئلة دي كده يمكن نكسب جائزة أصحاب العقول في زمن الفول.

  •  إيه سبب تفشي هذه الظاهرة؟ يعني ليه بنلجأ لمثل هذه الكلمات؟


  • هي دي ظاهرة صحية ومجرد التطور الطبيعي للحاجة الساقعة قصدي للغة؟


  •  إيه المشكلة لما نكثر من عبارات المجاملة يعني احنا خاسرانين ايه؟

طبعا ده مجرد رصد للظاهرة ومحاولة اكتشاف أسبابها بحثا عن التغيير لا أكثر ولا أقل وهجاوب على الأسئلة من وجهة نظري في حدود معرفتي الضئيلة.
 
أولايمكن أن نعدد أسباب لا حصر لها أدت الى انتشار هذه الظاهرة منها وأهمها

 وسائل الإعلام التي تكرث كل طاقتها للترويج لشييء تافه بطرق مبتذلة تستخف بعقول المشاهد بدءً من اللغة المنحدرة مروراً بالصورة القبيحة المبتذلة وانتهاءً بغياب المضمون وتفاهة المعلن عنه، اذن مش هنسمع لغة محترمة.

  • أننا لا نقرأ. معدل قراءة الفرد العربي في السنة مخزي اذا قورن بمعدل الفرد الأجنبي(ده بإفتراض اننا بنقرا أصلا، القلة دول كتر خيرهم برضو).وبكده مش هنسمع لغة ولا هنقرأها طب نجيبها منييين؟


  •  أحياناً وأكرر أحياناً(مش كل الناس ينطبق عليها هذا السبب) يلجأ البعض لإستخدام مثل هذه المفردات لإخفاء حقيقة مشاعر أو انعدام وجودها من الأصل"أيوة بتحصل متنكروش" مثلاً جارك في العمارة علاقتكم لا تتعدى الجيرة فتجامله بكلمتين حلوين اهو كله فميزان حسناتك والنبي وصى على سابع جار...طيب لو زميل في العمل مضطر تتعامل معه مع أنك مش مولع بحبه وانتوا فاهمين طبعاً فيلجأ البعض للمجاملة بزيادة والإكثار من العبارات الملطفة "عشان تطري الأعدة وتزحلق الوقت بدون احتكاك يؤدي لإشتعال الحرائق.


  •  لو مش فاكر اسم احدهم وبتحاول تهرب بصنعة لطافة.

ملحوظة: أنا رافضة بشدة اللجوء لتفسير "هذه سمة عصر السرعة" لأن المعنى ممكن يوصل بدقة أكثر وفي ربع الوقت اذا تم حذف هذا الكم من المجاملات.

السؤال الثاني هل هي ظاهرة صحية؟؟ وهل ده تطور طبيعي؟

طبعاً لأ وليس لها أي صلة من قريب أو بعيد بتطور اللغة لأن اللغة العربية غنية جداً ومتجددة وثرية الى أبعد الحدود وأشكال تطورها تأتي في صورة ابتكار مفردات جديدة تلائم التطور التكنولوجي ومتطلبات العصر وأيضاً استعارات وتشبيهات تناسب البيئة المحيطة واستخدام المجتمع بكل فئاته، ولكن لا يمكن أن يكون التطوربفقدان الكلمات لما تحمله من معنى. هذا الشكل من التغير يعتبر تأخر وتراجع في استخدامنا للغة وعلى رأي د/علاء الأسواني في عمارة يعقوبيان "احنا في زمن المسخ" والمسخ طال اللغة كمان فأصبح مسخ لغوي...أي جامدة مسخ دي شكلي بقيت نفخ ولا ايه؟؟!!

وأخيراً رداً على سؤال وايه يعني؟ فين المشكلة الى بتهددنا بسبب الظاهرة اللغوية دي؟ يعني الواحد لما لغته تنأح عليه الوجع ييجي فين؟

المشكلة ان الكلمة توقفت عن تأدية دورها في اللغة وهو توصيل معنى محدد بدقة بالغة فأصبحت الكلمات الان بدون رصيد لغوي زي الجنيه المصري كدة مالهوش رصيد ذهب في البنك...يعنى خذ مثال أيام أفلام الأبيض والأسود كان البطل يقول لحبيبته انت جميلة تقوم تحمر وتصفر ويبقى فاضل لهل جناحين وتطير..أو تقوله هي بحبك فيدرك أنه أسعد انسان في الوجود لأن معنى الكلمة أنها ستكرث حياتها لإسعاده. وكان شعارهم أفعال لا أقوال، الظاهر أن أيام الأبيض والأسود كانت أوضح كان الأبيض أبيض والأسود اسود.

أما في أيامنا الغبرة هذه فكلمة يا جميل أو يا جميلة لم يعد لها نفس التأثير وكلمة بحبك لم تعد بنفس القوة.كله مستهلك لدرجة انك أحياناً لا تستطيع تفسير ما وراء الكلام يعني بالبلدي ماتعرفش تقرا اللي قدامك.

ويبقى أن أقول أن اللغة نشاط مثل كافة الأنشطة يحتاج للممارسة من أجل البقاء والظهور بمستوى لائق وكما قال دارون في نظرية الإرتقاء والتطور"العضو الذي يهمل يضمر ويموت، أما العضو الذي يستخدم ينمو ويقوى" كذلك اللغة اذا تركناها ماتت وذهبت الى الزوال.

ولي تساؤل أخير أتركه لكم..هل الكلمة هى اللي فقدت معناها ولا إحنا اللي فقدنا صدق احساسنا؟؟


Thursday, October 15, 2009

Selections from "رباعيات عم جاهين"

شاف الطبيب جرحي وصف له الأمل
وعطاني منه مقام يا دوب ما اندمل
مجروح جديد يا طبيب و جرحي لهيب

ودواك فرغ مني .... و إيه العمل
عجبي !!!








إقلع غماك يا تور وارفض تلف
إكسر تروس الساقية و اشتم وتف
قال : بس خطوة كمان .. وخطوة كمان
يا اوصل نهاية السكة يا البير تجف
عجبي !!!






إنسان أيا إنسان ما أجهلك
ما أتفهك في الكون و ما أضألك
شمس وقمر و سدوم و ملايين نجوم
و فاكرها يا موهوم مخلوقه لك
عجبي !!






وقفت بين شطين علي قنطــــــــــــــــــرة
الكدب فين و الصدق فيـــــــــــن يا تري
محتار ح اموت .. الحوت خرج لي وقالي
هو الكلام يتقــــــــــــاس بالمســـــــــــطرة
عجبي !!!






نسمة ربيع لكن بتكوي الوشـــــــوش
طيور جميلة بس من غير عشـــوش
قلوب بتخفق إنما وحـــــــــــــــــدها
هي الحياه كده .. كلها في الفاشوش
عجبي !!!!






جالك أوان ووقفت موقف وجـــود
يا تجود بده يا قلبي يا بده تجــــود
ما حد يقدر يبقي علي كل شـــــــئ
مع إن – عجبي – كل شئ موجود
عجبي !!!








علي بعد مليون ميل من أرضنا
من الفراغ الكوني بصيت أنا
لا شفت فرق بين جبال و بحور
و لا شفت فرق ما بين عذاب أو هنا
عجبي !!