Showing posts with label Sarcasm. Show all posts
Showing posts with label Sarcasm. Show all posts

Wednesday, November 6, 2013

ثلاثون عاما من العطاء


صحيت النهاردة من النوم مفزوعة زي ال قرصني عقرب، جريت على المراية بصيت فيها لقيت حد تاني غيري، تجاعيد ظهرت بوضوح، في شعر أبيض ظهر مش فاهمة ازاي سبته كدة مصبغتهوش، حاسة بالام في ضهري وركبي، ايدي بتترعش ومخضوضة، هو انا ركبت الة زمن ولا ايه ال بيحصلي ده!!! بصيت في النتيجة لقيت التاريخ طبيعي 2013 مش في 2050 مثلا ولا حاجة..أومال اييييييه؟ جريت على الشباك الشارع هو الشارع والجيران هم الجيران، صرخت من أعماق الجحيم أنا مييييييييييين؟ ايه ال بيحصلي حد يجاوبنييي أرجوكم...

طرااااخ...صوت ارتطامي بالأرض صحاني من النوم...
فتحت عيني واتشاهدت يا ساتر على ده كابوس، ولا أعتى الأفلام الأمريكاني المرعبة، بعد ما أفقت من الصدمة والارتطام لقيت ماما وأختي داخلين عليا الأوضه مبتهجين قوي وعمالين يهنوني...كل سنة وانتي طيبة يا حلوة...هابي بيرز داي تو يوووو
اذن هو يوم مولدي، وتفسير الكابوس في نفس الوقت، انه شبح العقد الثالث، وداعا عشرينات العمر، وداعا للتهور الطفولي وال "هيبيز ستايل"، وداعا حَب الشباب ووداعا قصص الحب الملحمية، على شاكلة "قطعت شراييني عشانك يا سارة"...
منذ عيد ميلادي السابق وانا أخشى هذا اليوم وكأنه نقطة تحول مفاجئة في حياتي، مش عارفة بالظبط ايه ال هيحصل فيه بس عارفة اني متوغوشة كدة ومرتابة مما يحمله لي...طيب أهو جه، ياهلترى ماذا يخبئ لي هذا اليوم الذي طاردني طوال السنة الماضية، فالأواجه بشجاعة التحدي...عشان معنديش اختيار تاني الصراحة

بصيت تاني في المراية، لقيتني زي القمر زي مانا، شعري نفس الطول واللون والحرية، عاوزة أقصره شوية ممكن، وشي هو هو..أنا هو أنا..وبعمل نفس الحاجات، كالعادة فتحت الكمبيوتر وفتحت بروفايل الفيس بوك، وهالني شلال التهاني الصادقة من أصدقائي، وكم التليفونات ال استلمتها في نفس الوقت على موبايلي وموبايل أختي وتليفون البيت في نفس ذات اللحظة...بعد شوية لقيت جرس الباب بيرن و دليفري حاجات حلوة قويييي من مكان انا بحبه، وكانت دي تهنئة أختي العزيزة، بعد ما طبختلي أكلة على الفطار "احنا في رمضان" بس ملوكييي يخليكي ليا يا رب

صباح الخير يا بابا...البنك المركزي فتح أن أن ااااه واشتغلت في راسي فورا أغنية "فلووووس، تارا تاتا تاراا، تعلي توطي.." تهنئة  الأب ليها شامخة ياناس برضك، ظرفني ال فيه النصيب وانا رديت التحية برقصة "بطة على صفيح ساخن" من الزأططة طرحت أفراد الأسرة أرضا من الضحك

الله طب مانا مبسوطة أهو ومش حاسة باكتئاب "ومضى قطار العمر يا ولدي"، وخرجت مع أصدقائي على مدار يومين متتاليين، وكان أحلى شعور في الدنيا عشان المرة دي لم يكن الاحتفال صاخب ولا فيه ناس كتير، الأول كان احتفال من شخصين والتاني من شخص واحد، تمت المراسم في هدوء صاخب، يعني ايه؟ يعني تبأة  قاعد هادي بتشرب كابوتشينو في صمت ومتنح للبحر، بس دقات قلبك عاملة مزيكا حلوة مالية كيانك عشان وسط أكتر ناس بتحبهم، وسعادتك اكتملت عشان الناس دي لسة في حياتك وبيشاركوك أي حدث بيحصلك بمجرد وجودهم...

في النهاية أدركت أن الكلام ال كنت بقول عليه فارغ وانشا، بتاع الحياة بتتحسب بلحظات الفرحة ال بنعيشها مش بعدد السنين طلع صح!!!

اكتشفت ان في ناس كتير بتحبني، وان عندي عمر مليان بكل أشكال الحياة، أنا عايشة حتى النخاع، عايشة بكل خلية في جسمي، وكل يوم شايللي جديد، أصحاب جداد، شغل جديد، حب جديد، فراق جايز، مواقف صعبة أو حلوة، المهم ان في حياة، الانسان بيحس بالعجز لما حياته تفضى من الحاجات دي، أو لما تخلو من الذكريات....
الحمد لله مقدرش أتمنى أكتر من كدة، فالنكتشف ملامح العام الجديد أيا كان الرقم الذي يحمله

شيماء سعد

14/07/2013 

Wednesday, June 19, 2013

انت جاي تشتغل ولا جاي تهزر؟

المقال ده عن حدود العلاقات بين الزملاء داخل مكان العمل، الموضوع ال بيعاني منه كل شاب و فتاة...هي الفتاة بتعاني أكتر بس ده لا يمنع ان بعض الرجال برضه بيحصلهم مضايقات، أي شركة في نظري هي بوتقة انصهار، يعني شوب الفخفخينة وكوكتيلك يا فرغلي، بالنسبة للإسكندرانية كوكتيلك يا قبيسي (اللي في بحري عالبحر.. جرب المانجة عنده وادعيلي)...المهم خلينا ف موضوعنا، أي مؤسسة بتجمع ناس من خلفيات متنوعة واختلاف في التربية والعقائد والطباع على عكس أصحابك اللي بتختارهم شبهك، قوم اييييه ده بيعمل نوع من الفرهدة النفسية للموظف، حيث ان في ناس بتتخطى حدودها معاه من وجهة نظره
 ولذلك هناك خطوط عريضة اتبعها عشان تريح دماغك من أم اللت والعجن اللي بيحصل في الشغل...

1. تجنب الانحياز أثناء النم: طبعا الناس كلها تقولك أول ما تلاقي الناس بتتكلم على حد قوم وامشي، ده صح....بس في يوتوبيا ان شاء الله، كدة انت ضمنت تبقى المواطن إكس من منبوذيا ..لأ انت لو اضطريت تقعد أقعد، بس لا تتفاعل ولا تنحاز،قل حسنا أو فالتصمت. بكدة تبقى عرفت أخلاق كل واحد فيهم وعلمت عليه، ومحدش مسك عليك غلطة وفي نفس الوقت مش اخد جنب وعايش دور الأوتيزم أو عباد الشمس.

2. البنت غير الولد وماهيش كمالة عدد: هزار البنات مع بعض غير هزار البوابين قصدي الولاد مع بعض، غير بقى هزار دول ودوكهم برضه مع بعض، يعني ماينفعش أي تلميحات لامؤاخذة كده ولا كده في الكلام، حتى لو على سبيل الدعابة، مينفعش كمان تشتم الشتايم الطبيعية اللي بتقولها مع صحابك بره (اعفيني من الأمثلة لأن المقال مش هيكفي قاموس الشتائم الرجولية ناهيك عن رفدي من الموقع ان لم يكن السجن وانت أدرى بقى)، وفي هذا الشأن يحضرني كام موقف كده حدث بالفعل...

مشهد 1:
الباشمهندس في نص الشركة قدام العملاء: صباح الفل يا جمييييل
الأستاذة: صباح الخير يا هندسة
الباشمهندس: والنبي عندي ورقة متعطلة ف...بلا بلا بلا ماتخلصيهالي
الأستاذة: تؤمر من عنيا
الباشمهندس: بوسة في الهوا
الأستاذة: !!!!!!!!!!!!!!!! مع توهج مخيف بلون أحمر ناري في الوجنتين
مشهد 2
الزميل: مزّة قوي العميلة دي بس لو تخس شوية من .......
الزميلة: انشقي يا أرض وابلعيني
مشهد 3
الزميلة لابسة حاجة جديدة فاضلة خيرك أول الشهر وقالت تدلع نفسها
الزملاء الأفاضل: تصفيير حاااد مع نظرات فاحصة من فوق لتحت وبالإتجاهات الفرعية وزوايا لم يعرفها فيثاغورس نفسه...مع تعليقات لزجة من نوعية ايه هنسمع خبر حلو قريب؟ منين ده وبكام و...الخ

مشهد 4
هو: عاوزين موظف راجل
هي: ليه أنا قصرت في ايه؟
هو: عاوز أسب الدين وحضرتك مش هتستحملي (قال يعني هو كدة ماشتمش)
3. نووو تاتش: لا كتف كدة ولا زغدة ولا لطشة بريئة أو أي تفاعل جسدي، ده قانونا اسمه سكشوال هارسمنت يعني تحرش وممكن تروح في 60 داهية...العشم بحدود يا حاج، وخاصة في المجالات الرجولية زي المصانع والأوتوموتيف والصناعات الثقيلة، تلاقي الشركة كلها على بعضها فيها 5 بنات بالكتير والرجالة بيتعاملوا معاهم كأنهم الواد بلية زي ما ذكرت سابقا .

4. نحافظ على الألقاب لو قدام عملاء يا رييييييت

5. نحي الدين جانبا، دي علاقة الفرد بربنا، ماشوفكش بقى بتزن على فلانة عشان تقوم تصلي، ولا فلان مجاش صلاة الجماعة ليه ولا مش صايمة ليه التلات أيام البيض....مالكش دعوة والكلام واضح وربنا أمر بالستر.
وأخيرا حط دي حلقة في ودنك: أقرب واحد من الزملاء لازم يقف عالشط التاني في حياتك...صاحب واخرج واضحك وساعد بس خلي أمورك الشخصية شخصية عشان لما بيحصل فركشة الخسائر بتكون فااااادحة وده مكان أكل عيش يابا مش طالبة فضايح.
وربنا يستر علينا جميعا


شيماء سعد لموقع ياراجل
06/06/2013
http://www.yaragel.com/shoghl/110-enta-gay-teshtghl-wla-gay-tehazr

Sunday, June 2, 2013

ازاي تعدي ال "هارت بريك" بسهولة ويسر

 طبعا أغلبنا ان مكانش كلنا، عدى باللقطة بنت الكئيبة دي، الإنفصال، ال بريك أب، ذا بيج فركش، وداعا يا حلم العمر. من أصعب اللحظات في حياة أعتى العتاه، وعشان كدة دخلت على صديقي المخلص جوجل وفرهدته سيرش، كل ما كتب باللغات الحية والميتة ولغة الاشارة عشان يقوللي نعمل ايه؟؟ نعدي الفترة دي ازاي من غير ما نتحجز في مستشفى العباسية عنبر شديدي الخطورة.. الصراحة جوجل مقصرش وعداه العيب وأزح، لكن النتائج لم تكن مرضية بالنسبالي، كلها نصايح صايصة كدة من عينة نصايح أوبرا 
وينفري ال هي ماتأكلش عيش خصوصا في مصر...أوبرا دي حبيبتشي والله

فقررت أعمل بحث ميداني وأجمع الخبرات العملية والوصفات المجربة، وإليك الحلول ال هيكون لها أثر ايجابي مباشر في ال هارد تايمز دي "امنعوا الضحك":

1- حاول تنهي الموضوع بخناقة: والله دي نظريتي شخصيا، عشان جو وائل جسار " خلينا ذكرى جميلة واوعى تنسى زمان" هيؤدي مباشرة لجو عمرو دياب " اّه م الفراق ال يتفقوا الحبايب فيه يبأوا صحاب"...لأ والف لا، حاول تخلي النهاية مأساوية بحيث انك لما 
ترجع للمشهد  تقول لا ده أنا نفدت بعمري

2-نام كتير: النوم هروب من الواقع المؤلم، عكس بأة ما بينصحونا بيه، إن واجه المشكلة والكلام ده، أنا بقولك اهرب، اجري يا مجدييي. أول يومين دول نكد السنين ومش بيعدوا، نام وعديهم بأقل الخسائر، انت يعني لو صحيت هتعمل ايه غير انك تقطع شرايينك، أو تروح مكلم الطرف الاخر وينتهي الموقف ب دراما غير مطلوبة...نام مش عيب، واهو بالمرة تخلص من زن الناس، مالك؟ ايه مضايقك؟ والهري ده

3- ميلودي الحقيقة المرة "واجه": نيجي هنا لمرحلة المواجهة، بعد جهازك العصبي ما يكون اتدمر قصدي هدي وارتاح من النوم بعد أكشن الفركشة، جه أغلس وقت ممكن تعدي بيه ودي حقيقة مش هعرف أقلش فيها ولا أصورها بصورة كوميدية، هي بيور نكد...لازم تتقبل فكرة انه خلاص، بح، مفيش فلان/فلانة تاني وانت مضطر تعيش الحياه بدونه. مش بقولك اكرهه او انساه دلوقت، اطلاقا، فكر فيه وعيط ودبدب في الأرض ، بس كل ده وانت مخك مدرك ومصدق انه جيم أوفر مش انك منتظر معجزة الهية ترجعهولك أو ترجع بيكوا الزمن للأيام الخوالي، ببساطة  "ليت جو" الحلم الجميل، ليس كل ما يتمناه المرء يدركه، وشوية ايمان بالله هيعدوا الموقف السخيف ده

4- امحو اثار الجريمة: انسف حمامك القديم، بما اننا اتفقنا ان حبيبك ده من الماضي، ف بلاش نتكلم في الماضي الماضي ده كان كله جراح، امسح الرسايل كلها من الموبايل بعد القاء نظرة وداع عليها، امسحه شخصيا من الفيس بوك لو تقدر أو على الأقل اختار أوبشن انك ماتتلقاش أخباره في صفحتك، امسح سجل المكالمات كله، أي حاجة تربطك بيه دمرها، دي مش ندالة، دي عملية استئصال فترة زمنية في حياتك، يعقبها فترة نقاهة واستشفاء

5- دلع نفسك عالاخر: عزيزي المفركش اخرج واسهر واعرف ناس جديدة وكل سوشي حتى لو مش بتحبه، اديله فرصة، وماتقولش لحد انت فين ولا مع مين ولا بتعمل ايه، اقفل موبايلك وانطلق، انزل البحر أو حمام السباحة واستجم، عندك كمان الحشيش، من أقوى مسكنات الفراق ويفيد في حالتك وأكم من حشيش ساعد ناس في التغلب على المصاعب هاهاها (بهزر ماتتلككش)....انبسط حتى وانت متعكنن
عزيزاتي الفتيات أوصيكم ونفسي بال شوبنج، هو تأثيره  زي الحشيش بالظبط بالنسبالنا، والمونكييير بأة الأصفر والأزرق والفسفوري وكل الألوان، إعمي الناس ولا يهمك فداكي، وكلي أيس كريم وشوكولاتة وكربوهيدرات عشان مستر هوبينز بيقولك دي اسمها ال كومفورت فود وبتعدل المزاج

6- لو ده جنان اتجنن: اعمل حاجات جديدة أول مرة تجربها مهما كانت مجنونة، اتعلم/ي رقص، بانجي جامب، سافر مكان جديد، العب مزيكا، غني كاريوكي واضحك على نفسك، اتعلم ياباني، المهم تجرب حاجات جديدة تماما عليك عشان تسحب تركيزك بدال ما تفكر ف أي استغفر الله العظيم حد، وفي المرحلة دي لازم تكون دايما مع ناس، محاط بجحافل من البشر، ماتقعدش لوحدك أبدا

7- كن جميلا أمام نفسك: لأزم تحس انك جميل عشان الثقة بالنفس دي من أهم محفزات النسيان والرغبة في الحياة. روح ال جيم واعمل فورمة الساحل "أنجك أماينو ولا يهمك" وانتي اهري نفسك جري عالمشاية "وانتي بتاكلي الأيس كريم عادي"، أو انزلوا اجروا يوم الجمعة الصبح في أي مكان نضيف، جايز تقلب ب كان يوم حبك اجمل صدفة لما قابلتك مرة صدفة - ابعت يا رب- ، بس لو الصدفة خبطت في مراكز التحكم في القدر وقابلت الحب القديم أنا بريئة من الدم ال هيحصل، ممكن كمان قصة شعر جديدة بأة ولبس جديد واشتروا حاجات غالية السوق نايم شجعوا الاقتصاد، المهم تحب صورتك في المراية، وسيبك من موضوع الجمال جمال الروح ده، روح ايه يا بعيد طلعت روحك، ده انت رايح ف داهية وعنيك منفخة من السهر والعياط. اعمل بمقولة أنا حلو وزي الفل أنا حلو ف عين الكل، وده هيؤدي بيك لمرحلة  ده انا خسارة فيه هو يطول؟ كدة انت في اخر مراحل الشفاء

8- نسيت أقولك أهم حاجة، توقف عن سماع الأغاني لفترة: أي أغنية هتقع ف ايدك، هتأيفها على مأساتك حتى لو أغنية أم الشهيد برضه هتأيف مشكلتك عليها وتعمل نفسك أم الشهيد أو الشهيد نفسه وتبأة حوسة بأة

9- وأخيرا بعد مراحل ال "هيلينج" ما تغطي على وجود أي"فيلينج" انتهج منهج  عمك وعم الشباب عمرو دياب في رائعته تجربة وعدت عدت عدت عدت عدت عدت عدت عدت عدت عدت عدت.....الى مالا نهاية  

10- كلمة بأة أبرك من عشرة: محدش بينسى تجاربه، في الواقع ال بيحصل اننا بنخبي التجارب دي ف صندوق صغير قوي بعد مدة لما تأثيرها بيقل كتير وبنقفل على صندوق الذكريات المؤلمة ده ب 100 قفل ونحطة ف أعماق الأعماق، عشان نفسح مكان لأمل جديد، وهي دي الدنيا... واّه يا دنياااا
حمد الله عالسلامة يا وحش

شيماء سعد
10/04/2013

ازاي تخلي مديرك مايستغناش عنك؟؟؟

السؤال الذي أفنى أعمار، ودمر أجيال، وحير العقول !! وكأنك بتسأل بكل براءة، ازاي أنفذ المستحيلات السبعة في نفس واحد.
طبعا هتلاقي كتب بالهبل بقى تقولك كن مثالي وكن منضبط واشنق نفسك كل يوم وولع في مراتك وعيالك عشان سعادته/ها ينبسطوا، لأ هيهات ثم هيهااات، احنا هنا بنقف على أرض الواقع، خلاصة الخلاصة بقى ومن الاخر خد الكام نصيحة دول وادعيلي:

أولا معاملة المدير الرجل حمادة ومعاملة المديرة الست حمادة تاني خاااالص، ومفيش داعي أقول لو مديرتك واحدة ست "خاصة انسة" يبقى تراجع علاقتك بأمك عشان أكيد داعية عليك من قلبها.
المدير الرجل:
- جوزك على ما تعوديه: بمعني من أول يوم افرض شخصيتك وماتخافش تقول لأ، خلي قلبك ميت

- ماتخافش تعرض رأيك مهما كان مختلف طالما في مصلحة العمل (مش في مصلحتك انت يا نمس عشان الحاجات دي بتتفقس وهتبقى بلاك ليست في لمح البصر).

- مانحاولش تفاتح مديرك في أي موضوع خاصة الأجازات في الحالات الاتية: لو هو جعان، مراته منكدة عليه، مديره مديله دش بارد.
غير كدة توكل على الله، وماتفاتحوش برضه.

-كن لطيف مع زملاء العمل: ده قدام مديرك بس، أول مايمشي ولع فيهم بجاز.

-انزل معاه القهوة بالليل: ودي أهم من كل الي فات، القهوة دي كنز لا يفنى ونعيم لا ينضب ومفعولها كالسحر، طب لو مالوش في القهاوي؟ علمه، خد بإيده وضيعه (لأ بلاش حشيش في المرحلة دي خليها وقت التقييم السنوي). وانت سهران معاه هتعرف معلومات كتير زمايلك ما يعرفوهاش، ممكن تسخنه على زميلك اللي انت مش طايقه، تفاتحه في ترقية بعد ما تكون حكيتله قد ايه الحياه صعبة بعد البامبارز ما غلي، بكدة هتكون انت فشى التاتة الأول عنده، وأوعى تديله فرصة يقرب لحد غيرك، اعمل عليه كماشة....اه ابقى اعزمه على كرسي معسل بلاش بخل، كله عشان مستقبلك

المديرة الست: بالنسبة لرئيسة التحرير بتاعتنا "استثني نفسك خاااالص من الموضوع ده، دانتشي حبيبتشييي":

- المرأة الشبكة، والرجل الصندوق: دي نظرية مشهورة، يعني ماينفعش تكون مباشر وصريح بتاتا، لازم تلف وتدور عشان الستات دايما بيشككوا في نية أي موظف، أو نية أي كائن حي غير أحادي الخلية أصلا.

- تحسسها ان مالكش رأي ولا رؤية من غيرها وانها الكل في الكل وهي بطلة الحرب والسلام

-لما تكون شايفها هتخيش بالشركة وخلاص لا محيص انك تبدي أستغفر الله العظيم رأي، اتبع أسلوب حويط ومعقد، يعني شوف كل الحلول الزبالة اللي تودي ف داهية واطرحها وبصنعة لطافة بينلها عيوب كل مقترح، وفي الاخر خالص، قولها طب تفتكري لو عملنا كذا "أهو...رأيك أهو يا معلم"، ممكن ايه ال يحصل؟؟ وقبل ماتبدأ هي تفكر في أسباب فشل فكرتك انزل انت بأسباب نجاحها، وضيق عينك كدة وحسسها انك مركز وبتعصر مخك

-عاملها كأنثى قبل مديرة (حتى لو هي شبه النمر الأسود)، حسسها ان مين اللي أمه داعياله اللي هيتجوزها، أو ان مفيش حد يستاهلها أصلا وانها أكبر من انها تدفن مهاراتها وذكاءها مع مجرد راجل، مفيش مانع برضه تحسسها ان كل الرجالة في المكان عينهم منها، لو انت مش متجوز في احتمال نباركلك وساعتها أنا معرفكش، اتصرف.

-العب على نفسية الخصم، في أوقات تلاقي الستات اكتأبوا كده بدون أسباب ومش طايقين نفسهم ومحبطين، كن أنت الكتف الحونين، اسألها في حاجة معكرة مزاجها؟؟ هاتلها شوكولاتة واكتب عليها "عشان جالاكسي هي اللي بتخلينا نعدي كل ده"....ملحوظة: بالرجوع للنقطة السابقة أعتقد ده وقت تلبيس الدبل...ألف مبروك

وعلى غرار أسلوب الكابتن محمود بكر: واحد بقى يسألني انتي إيه مؤهلاتك عشان تنصحيني بخصوص حياتي العملية، ولهذا الشخص أقوله، مش عشان بقالي سنين بلعب دور المرأة العاملة، ولا اني إشتغلت مع مديرة ومدير، ولا اني بنت فا فاهمة حركاتهم النص 
D:كم...أبسولوتلي، أنا بس لسة مخلصة خناقة مع مديري وربنا وفقني وطلعت منها وان بيس "وده بجد"


شيماء سعد / لموقع ياراجل
11/04/2013
http://www.yaragel.com/shoghl/64-2zay-t5ly-moderk-mystghnash-3nk

Wednesday, February 13, 2013

ارفع راسك فوق انت....مطلق


عزيزي المطلق المحبط ال فاكر ان طلاقك هيطفش البنات منك وانك أصبحت سكند هاند وسعرك مش زي الزيرو، أحب أقولك....أبسولوتلي، في فئة كبيرة جدا بتفضل اليوزد عن الزيرو...قول ليه؟؟

أقولك:
       - الراجل المطلق عاش قرف ونكد في حياته بما يكفي ويفيض، فمعندهوش رغبة ملحة في اعادة المشهد، وبيوجه كل مجهوداته عشان يعيش مبسوط وينجح الجوازة...وده مثبت في علم النفس، الرجل بيبذل مجهود أعلى لإنجاح الجوازة الثانية

   - في بنات بيدوروا على الخبرة في الأمور الحياتية ومين أحسن من ال جرب المشاكل عشان يتفاداها، بدل ما الواحد يدخل بغشومية وعشم زيادة في الجوازة  وفجأة كل أحلامه تتحطم على صخرة الواقع....عشان أقربلك النقطة دي، فكر تشتري عربية، أول حاجة بتعملها ايه؟؟؟ بتسأل حد ساقها عشان عارف مشكلاتها المحتملة وازاي تتفاداها أو تصلحها، هو كدة بالظبط.

 
      - الراجل المطلق ده لقطة، ده طول عمره مشافش يوم عدل، يعني لو بؤين حلوين كدة عالصبح ولا تسبيل حاد لمدة 5 دقايق ممكن يعيط من السعادة...دول غلابة يا  ضنايا وبيرضوا بقليله.

 
       - طول عمره هيفضل يعامل زوجته على إنها الهدية ال ربنا بيعوضه بيها عن الإبتلاء الأول...وهنا أحب أخاطب عزيزاتي الفتيات، أرجوكن ال ناوية تتجوز مطلق ماتخليهوش يعيش البلاء مرتين ويوصل ل مرحلة "احنا اسفين يا زوجة أولى"...حرام ده روح برضه، اكسبي فيه ثواب وكوني عاقلة

 
       - الرجل العادي طول الوقت عاوز يتجوز وخلاص عشان البنت ال بيحبها أو عشان يكون عنده أولاد أو لأسباب بيولوجية أو نفسية، المهم هيموت ويتجوز....أما المطلق أصلا مش عاوز، ف فكرة أنه ياخد الخطوة مرة تانية معناها إنه فعلا مقتنع بعد دراسة جدوى متقنة ورؤية مستقبلية تحليلية متأنية وعذاب وسهر ليالي ومراجعات واختبارات، انه شايف الموضوع ناجح بنسبة كبيرة، وده سر الخلطة لإنجاح الجريمة
 

طبعا لكل شيئ مساوئ ومميزات وأكبر مشكلة بتواجه الطرفين هي ان الراجل بيكون معقد شوية والبنت معندهاش وعي شويتين، بس كله بالحنية بيفك، شوية عقل كدة وهتمشي زي السكينة في الحيلاوة ان شاء الله

 
ولا أراكم الله طلاق في عزيز لديكم

 
شيماء سعد
11/2/2013

Wednesday, January 23, 2013

صباح سكندري عاصف


كل نوة وانتوا طيبين..وانتوا عارفين نوة راس السنة دي أشد وأحلى نوة في السنة....
الساعة 7 الصبح..رافض تسمع صوت المنبه الكريه وهو بيصحيك بالعافية ناقص يسحب البطانية أو اللحاف من عليك، بس انت مش قادر تصحى لأنك طول الليل مانمتش من صوت الرعد والبرق والمطر قصدي "الشتا" اللي نازل يخبط في البلكونة..فتفضل صاحي وهاتك يا كاكاو وسحلب وما تيسر من الكابوتشينو وفي بعض البيوت المرفهة بيعملوا حاجات ب اختراع اسمه"فليفور" ومش عارف ايه...مابتعرفش غلطتك في كتر الشرب ده غير أما تحس انك لازم تقوم تعمل زيارة سريعة لمكان ما "وانت قاريني يا باشا"..انت متلج وأطرافك تكاد تسقط بس خلاص لا محيص، الكلى غالية برضه يا ناس زي الضنى بالظبط...وبعدها سلطان النوم غلبك فسحبت ساعتين كده...
قصره أديك صحيت على صوت رعد وكأن البيت هيتهد، وبدأت في طقوسك اليومية من أول مابصيت في المراية وانت بتغسل سنانك أو بتحلق "للرجال" أو وانت بتحاولي تظبطي الإعصار اللى طال شعرك بأي شكل عشان ماتأذيش الناس، حرام مالهمش ذنب. وتبدأ معاناة السكندري يا ولاد في مرحلة تغيير ملابسه، الفكرة نفسها تخليك تقشعر من البرد، والطبقات كتيير وكل طبقة بتشيلها، البرد يضحك عليك ويقولك تعالالي يا حلو..بعد الصراع ده تبدأ بأة تلبس...شرابااات، باديهاات...بلوفرااات...جاكتااات...ونقفل بكوفيات و جوانتيهات وطبعا تقفذ بال بوت..
تتشاهد وتاخد نفس عميييق وتفتح باب الشقة، وانت على أول سلمة تسمع صوت "يا فلاان اشرب بق ميه عشان متاخدش برد"..ترجع عشان ماتزعلش ست الحبايب وتشرب المية...وتوكلنا على الله...
تجري بخفة ودلع لحد عربيتك، مش نشاط منك يا خفة، ده عشان بحيرات المية اللي ما بين بيتك وعربيتك قربت توصل للركب، وتنط فالعربية وتبوس دريكسيونها عشان تدور وأخيرا صوت الموتور يعلى كأنه بيشتمك "ده جو تنزل فيه يا رخم؟؟"
طبعا الي بيسوق هتلاقيه بيتلكك عشان ياخد طريق الكورنيش، والمنظر كالاتي:
الساعة 8:30 الصبح، السما رصاصي غامق ومفيش نور، كله عامل انتظار وكأنها اشارة مدلولها "كلنا مش شايفين ف لو سلمنا مرايات أو بوسة في الرفرف، ماتتحمقش وخدها بروح رياضية بس لو خيشت هتبقي بروح *** حد من أفراد الأسرة الكريمة"... نفسك عامل بخار مية غير طبيعي كأنك في قهوة بلدي وفاضل صوت الكركرة – والأوبشن ده موجود في العربيات القديمة بس، هي بتكركر لوحدها – البحر عالي جدا، وأحيانا المية بتطول عربيتك، وانت مبسوط ومزاجك عالي عشان مشغل الراديو على "نص ساعة مع فيروز" ماهي بأت 9 الصبح...تبتدي تتوتر لأنك اتأخرت، مابدهاش بأة، اخواني السائقين مضطر أتغابى، اشمعنى أنا!! كسر يمين وشمال وطرطشة مية بأة "طبعا اقفل ازازك عشان متسمعش تحية السائقين ليك"، وبلاد تشيلنا وبلاد تحطنا والسكة طويييلة، وانت فيين يا مرزووووق؟!! وعادم الميكروباص اللي قدامك هبب الزجاج الأمامي، المساحات وقفت، مفيش مية يا ولداه في القربة!!! يعني ايه؟؟؟ أي سكندري في اللحظة دي هيفهم انه اتكتب عليه حاجة من اتنين:
  1. تلزق وشك في الزجاج الأمامي، أملا في انك تشوف مترين قدامك يظبتوك..ده لو انت قريب من الشغل خلاص.
  2. تركن على جنب وفوطك الحلوة واديها، هتطين منك بأة وتفضل تكافح لحد ما توصل لأفضل النتائج الممكنة.
وأخيرا يلوح أمامك ما يشبه مكان عملك...بسم الله نركن، بطل، قفل العربية.....
وحمدالله على سلامتك يا بطل...اتنيل اشتغل بأة وبلاش فيس بوك...حللوا الفلوس
وصباحك اسكندراني يا جميييييل ;)
شيماء سعد
2/1/2012

نصائح تهمك...أو ماتهمكش أي دونت كير


من مشاهداتي اليومية:
المرة دي أنا بكتب للتحذير...وقد أعذر من أنذر، بحاول أشرح للسائرون نياما..ال هم المشاه ازاي السائق بيشوفهم...هعرض نماذج بنشوفها كل يوم تحرق الدم (لو انت من اخواني السائقين)...
1. مرفت وعيلاء: طبعا دول ال بيتمشوا ف نص الشارع ولا كأنهم في نزهة خلوية...الواد الجن عاوز يعمل منظر طبعا ف يقوم مشاور بإيده للعربيات تقولش الريس...-أيام ما كان عندنا ريس-، وبكل ألاطة يتوقع ان المرور- لأ الكون كله - هيستجيب لإشارته متفهمش ليه!!....تيجي انت تهدي عشان تعديه، واجب وشهامة منك..تلاقيه بيبصلك نظرة انتصار لا تخلو من بعض الشماته، وال " بانانا" ال معاه تحس انها مع هيرو بأة وممكن ترقع زغروتة ف نص الشارع مع تسبيل وبربشة كتير...
- ده حله ايه؟ انك تديه بالرفرف واحدة كدة تفكره بحجمه
2. الأب: نموذج الأب ال هو راجل كبير وغالبا ناصري..تلاقيه لسه جو الثورة مسيطر على تفكيره وشايف ان كل من هو دون ال 60 سنة دول شوية عيال متسرعين وتافهين...وبيتوقع انك لو ماعدتهوش هيمدك على رجليك أو يربطك في الفلكة، وغالبا هيلم عليك الناس ويديلك درس في احترام الكبير والتأني مع استعادة بعض ذكرياته في الحزب الاشتراكي، وممكن يختم كلامه بقرصة ودن..
- ده حله ايه؟؟ انك تحاول تعديه وانت ساكت وماتبينش أي علامات استياء أحسن يفرش في الأرض ويقولك وريني هتعدي ازاي...اه خلي بالك الجيل ده لبط قوي، عشان لو انت متأخر وده غالبا، فإنسى معادك...وأهو زي والدك اكسب فيه ثواب ومتأوحش كتير..
3. القطة: طبعا مش محتاجة شرح...الفتاة القطة، شايفة نفسها وبريستيجها مايسمحلهاش تجري بسرعة عشان عربية، نظام أنا مبتهددشش. وممكن كمان يكون ال سايق شاب ظريف ف مفيش مانع انها تهدي قدام عربيته وربنا يسهل ، يا يخبطها، وهنا في فرصة كبيرة انها تستهبل ويغمن عليها وتقوله وصلني والله المستعان، أو السيناريو الأكثر انتشارا انه يطلع زوق ويضرب فرامل فيلبس في ال وراه و يتشتم فيشتمها وتتكسر كل أحلامها على أكسيدام الواقع J
- حلها ايه دي؟ ادعيلها بالهداية... بس هي لو اتخبطت مرة هتحرم، وممكن تكون انت الانسان الشهم ال هيقدم الخدمة دي للمجتمع ويخبطها. بس لو لبست جوازة ماعرفكش...
4.المتردد: ده أكتر نموذج بيعصبني...ليه؟ لأنه بالنسبة للسائق هدف متحرك ، خاصة لو انت رايح الشغل الصبح و اكلينيكيا نايم وأكيد متأخر. وصورة ال "اتش أر" قدامك عالطريق مستنيك ب خصم محترم، ف انت بتحاول تعدي أي حاجة قدامك عشان ماتقابلش الوحش في اخر مرحلة..ودي أخرت لعب ال بلاي ستيشن.
- حله ايه؟؟ ما تاخدكش بيه أي شفقة...ده عنده مشكلة نفسية، اعمل فيه معروف واخبطه برضه عشان يتعلم ياخد قرارات سريعة وحاسمة...يا يطلع قدام يا يتنيل يقف لحد ما حد كبير يعديه. صدقني هيدعيلك لما يدرك الخدمة ال قدمتهاله...معرفش هيدركها امتى أو هيلحق يعيش عشان يدركها ولا لأ...
أخيرا وليس اخرا...لي استفسار لك عزيزي السائر...
منين جبت كل الثقة دي في فرامل العربية؟؟ أو في قدرات السائق؟؟ أو مزاجه؟؟ أنا شخصيا بكسل أفرمل أيوة أنا مانيوال يعني الفرامل مجهود برضه ويترتب عليها تغيير نقلات ووجع دماغ.
انما السؤال الملح بأة، منين جبت روح الإستنطاع دي كلها؟!!!
شير في الخير، ولك الأجر والثواب
 
شيماء سعد
3/4/2012