Showing posts with label Ethics. Show all posts
Showing posts with label Ethics. Show all posts

Sunday, June 2, 2013

كله تطرف فكري


أنا مضايقني جدا التعصب ال بشوفه كل يوم من كل الأطراف ال متخيلين انهم ليبراليين وال متخيلين انهم محافظين

طالع موضة قوي اليومين دول ناس تحط صور من مصر في الستينات ولا السبعينات والبنات لابسة ميني جيب ومايوهات ويقولك الأناقةوالشياكة والأمان، أو صور لنساء ناجحات بس لازم يكونوا مش محجبات ويترحموا عالماضي، قصاد صور تانية حديثة لنساء "عذرا" تميزن بالغباء والتصريحات المستفزة يرتدين النقاب والعباءات السوداء أو متشددات بصورة ما ويقولك حالنا الان والتخلف عنوان المرحلة.

بصرف النظر عن رأيي في المرحلة أنا معترضة بشدة على المقارنة، ومعترضة أكتر ان وجه المقارنة يكون "ظاهريا" المستوى الثقافي و "ضمنيا" المظهر أو الربط بينهم بصورة ما.

في سيدات محترمات جدا لابسين حجاب صح أو ملتزمات زي ما بيطلق عليهم ووصلوا لمكانة أدبية وعلمية متقدمة جدا، وبالمثل أيضا في سيدات محترمات جدا مش لابسين حجاب خالص وبرضه مكانتهم محترمة جدا ليه مش بنشوف ده في مقارنات؟؟ عشان ال بيعمل كدة عاوز يثبت فكرة متطرفة لنفسه وللناس

لو عاوز تقول ان النقاب والتشدد غزو فكري وهابي ماشي براحتك بس ماتنساش أو ما تتناساش ان مثلا موضه ال "هيبيز"والحاجات دي كانت غزو فكري أوروبي برضه وكلاهما غير ملائم للمجتمع المصري من وجهة نظر الكثيرين ... 

العري  مش دليل الحرية والحجاب مش دليل التخلف. معيار الحرية يقاس ب مدى تقبلك لكل المتناقضات دي وماتحجرش على حد والمرحلة الأعلى بأة انك ماتصنفش حد أساسا، لو عاوزين نقارن فترات من تاريخ مصر يبأة نثبت كل المتغيرات المظهرية ونقارن فكر ب فكر، ويطلع زي ما يطلع، مفيش مشاكل.

لكن لو احنا مسكنا في المظهر وقيمنا التحضر بناء عليه يبأة ماختلفناش عن المتأسلمين في ان محور كلامهم كله عن اثارة الشهوات وال هو الذريعة الرئيسية في تحريم كل ما يترائى لهم تحريمه ويخدم أغراضهم!! انت بأة جايب ذريعة الثقافة والتحضر عشان تبيح بيهم حاجة مش بتاعتك أصلا...ده تطرف وده تطرف، ده تعصب وده برضه تعصب...

ال بتقلع الحجاب:  هي حرة ياعالم بال في ضميرها ممكن مش قادرة تعمل الفرض ده ومش عايزة ترائي ربنا، أو ببساطة زهقت وهي متحملة مسؤولية رجوعها في الفريضة دي!! يا سلام وانت ماشي بالمسطرة يعني؟ وحتى لو كدة برضه مالكش دعوة.

ال مش مقتنعة انه فرض: هي حرة حسابها مش عندك ولها أجر اجتهادها في البحث وعليها وزر ترك الفرض زي أي فرض اخر

وال لابساه ومش ملتزمة بيه:  هي حرة جايز متمسكة بالنص نص ده من وجهة نظرها عشان بتسأل الله يكرمها وتلبسه صح وتاخد خطوة للأمام بدل ما تقلعه وترجع خطوة للخلف

وال لابساه صح: ماتحطهاش في خانة لازم تعملي كذا أو ماينفعش تعملي كذا عشان انتي محجبة، انت مالك ؟ ماتحكمش عليها أو تصنفها، اذا كان ربنا بيحاسبنا على كل حاجة لوحدها،تعمل انت"باكيدج" حجاب ومش حجاب لييييه أو ملتزم ومش ملتزم أومتشدد و متحرر ليييه، الدنيا مش دوريتوس ميكس كل حاجة والعكس، مش أبيض واسود ده "سبيكترام" كبيير قوي ربنا بس ال مطلع عليه وهو بس ال يقدر يحدد مقدار الخير والشر في نفس كل واحد

كل واحد فينا عنده نقاط ضعف وصراعات داخلية وعيوب مخبيها أو بيستخبى من مواجهتها جوة نفسه انما مش ظاهرة للناس، ف يا ريت كان كل الناس عيوبها مظهرية واضحة، دي أسهل حاجة.

وأولا وأخيرا الدين معاملة، والمعاملة معيارك فيالحكم وبس...غير كدة انت متعصب ومتطرف مش ليبرالي

شيماء سعد
18/04/2013

Wednesday, January 23, 2013

نصائح تهمك...أو ماتهمكش أي دونت كير


من مشاهداتي اليومية:
المرة دي أنا بكتب للتحذير...وقد أعذر من أنذر، بحاول أشرح للسائرون نياما..ال هم المشاه ازاي السائق بيشوفهم...هعرض نماذج بنشوفها كل يوم تحرق الدم (لو انت من اخواني السائقين)...
1. مرفت وعيلاء: طبعا دول ال بيتمشوا ف نص الشارع ولا كأنهم في نزهة خلوية...الواد الجن عاوز يعمل منظر طبعا ف يقوم مشاور بإيده للعربيات تقولش الريس...-أيام ما كان عندنا ريس-، وبكل ألاطة يتوقع ان المرور- لأ الكون كله - هيستجيب لإشارته متفهمش ليه!!....تيجي انت تهدي عشان تعديه، واجب وشهامة منك..تلاقيه بيبصلك نظرة انتصار لا تخلو من بعض الشماته، وال " بانانا" ال معاه تحس انها مع هيرو بأة وممكن ترقع زغروتة ف نص الشارع مع تسبيل وبربشة كتير...
- ده حله ايه؟ انك تديه بالرفرف واحدة كدة تفكره بحجمه
2. الأب: نموذج الأب ال هو راجل كبير وغالبا ناصري..تلاقيه لسه جو الثورة مسيطر على تفكيره وشايف ان كل من هو دون ال 60 سنة دول شوية عيال متسرعين وتافهين...وبيتوقع انك لو ماعدتهوش هيمدك على رجليك أو يربطك في الفلكة، وغالبا هيلم عليك الناس ويديلك درس في احترام الكبير والتأني مع استعادة بعض ذكرياته في الحزب الاشتراكي، وممكن يختم كلامه بقرصة ودن..
- ده حله ايه؟؟ انك تحاول تعديه وانت ساكت وماتبينش أي علامات استياء أحسن يفرش في الأرض ويقولك وريني هتعدي ازاي...اه خلي بالك الجيل ده لبط قوي، عشان لو انت متأخر وده غالبا، فإنسى معادك...وأهو زي والدك اكسب فيه ثواب ومتأوحش كتير..
3. القطة: طبعا مش محتاجة شرح...الفتاة القطة، شايفة نفسها وبريستيجها مايسمحلهاش تجري بسرعة عشان عربية، نظام أنا مبتهددشش. وممكن كمان يكون ال سايق شاب ظريف ف مفيش مانع انها تهدي قدام عربيته وربنا يسهل ، يا يخبطها، وهنا في فرصة كبيرة انها تستهبل ويغمن عليها وتقوله وصلني والله المستعان، أو السيناريو الأكثر انتشارا انه يطلع زوق ويضرب فرامل فيلبس في ال وراه و يتشتم فيشتمها وتتكسر كل أحلامها على أكسيدام الواقع J
- حلها ايه دي؟ ادعيلها بالهداية... بس هي لو اتخبطت مرة هتحرم، وممكن تكون انت الانسان الشهم ال هيقدم الخدمة دي للمجتمع ويخبطها. بس لو لبست جوازة ماعرفكش...
4.المتردد: ده أكتر نموذج بيعصبني...ليه؟ لأنه بالنسبة للسائق هدف متحرك ، خاصة لو انت رايح الشغل الصبح و اكلينيكيا نايم وأكيد متأخر. وصورة ال "اتش أر" قدامك عالطريق مستنيك ب خصم محترم، ف انت بتحاول تعدي أي حاجة قدامك عشان ماتقابلش الوحش في اخر مرحلة..ودي أخرت لعب ال بلاي ستيشن.
- حله ايه؟؟ ما تاخدكش بيه أي شفقة...ده عنده مشكلة نفسية، اعمل فيه معروف واخبطه برضه عشان يتعلم ياخد قرارات سريعة وحاسمة...يا يطلع قدام يا يتنيل يقف لحد ما حد كبير يعديه. صدقني هيدعيلك لما يدرك الخدمة ال قدمتهاله...معرفش هيدركها امتى أو هيلحق يعيش عشان يدركها ولا لأ...
أخيرا وليس اخرا...لي استفسار لك عزيزي السائر...
منين جبت كل الثقة دي في فرامل العربية؟؟ أو في قدرات السائق؟؟ أو مزاجه؟؟ أنا شخصيا بكسل أفرمل أيوة أنا مانيوال يعني الفرامل مجهود برضه ويترتب عليها تغيير نقلات ووجع دماغ.
انما السؤال الملح بأة، منين جبت روح الإستنطاع دي كلها؟!!!
شير في الخير، ولك الأجر والثواب
 
شيماء سعد
3/4/2012

أخلاقنا...على فين!!


لاحظت في الفترة الأخيرة انتشار لهجة السخرية والتريقة على كل حاجة وأي حاجة، بحق ومن غير حق، أنا متفهمة ان الطبيعة الساخرة دي ناتجة عن جين مصري أصيل، وبحبها جدا بالتحديد في ما يخص السياسة، لكن كله في حدود، يعني لازم يكون في وازع أخلاقي يوقفنا عند حد معين من التريقة، واكيد الحد ده هو جرح مشاعر الاخرين.
أكثر ما استفزني بخصوص الموضوع ده هو الكوميكس أو الكاريكاتير ال بيتريق على بعض الأمراض المزمنة، مش عاوزة أوصفلكم شعوري لما قريت لأكثر من مرة دعابات سخيفة عن مرضى الزهايمر ومرة واحد عنده زهايمر نسي ي...-ومش عاوزة أعيد ذكرها لأني رافضاها قلبا وقالبا-، وكأن الناس فقدت حس الأدب وفقدت التمييز بين المسموح والغير مسموح، بمعنى اخر بين الظرف وقلة الأدب. مش عارفة ازاي وصلنا للوضع ده!!!
لو الناس تعرف مدى الألم ال بيمر بيه أهل وأصدقاء مريض الزهايمر، ومعاناتهم في تقبل الأمر أساسا، لو يعرفوا مدى الأذى ال ممكن يتسبب فيه كوميكس زي دي، وكمان ان سعادتك بتضحك عليها وشايفها "فاني قوي" !!! لو في ايدي أحط قانون يجرم الكوميكس والتعليقات دي ماكنتش هتردد.
يا ريت كل واحد فينا قبل مل يقول النكتة ال هتخليه محبوب وسط أصحابه، يفكر مردودها ممكن يكون ايه في نفس واحد قاعد معاكم وانت مش حاسس بيه. قبل ما تحكي عن فلان ال مات من السرطان وتقول ببرود اه يا عم ماهو محدش بيخف منه، أو طالما دخل الجسم خلاص، أو..أو... افتكر ان ممكن يكون واحد قاعد عنده أمل كبير في ربنا يشفي حد من أهله، ويمكن هو نفسه وانت ماتعرفش.
قبل ما تتريق على واحدة لابسة ملخبط وفاكرة نفسها شيك، ولا واحدة تخينة قوي فكر ان الظروف دي مش ب ايدهم، بس من حقهم يتبسطوا بدون ما سعادتك تبصلهم بنظرة استعلاء تحسسهم بكل ابتلاءاتهم لمجرد ان ربنا رحمك مما ابتلى به غيرك، والفضل مش ليك ولا بشطارتك، دي ارادة ربنا.
ده مش معناه اننا ماننقدش، لكن ننقد الفكرة، الفعل مش الشخصية، انتقد أفعال الرئيس براحتك، لكن ماتقولش مراته هتعرنا بلبسها، انتقد نفسك واضحك عليها براحتك، انتقد اعلان مستفز بس مالكش دعوة ب أخلاق الموديل، انتقد أعمال الهام شاهين وأدوارها التافهة، لكن ماتقولش عليها زانية.
كفاية لا مبالاة وياريت شوية تركيز في كلامنا ومراعاة لشعور الاخرين، والكلام ده لنفسي قبل ما يكون لأي حد تاني
وشكرا لسعة صدركم
شيماء سعد
2/9/2012