ازاي توفق بين شغلك واصحابك؟؟

المفروض أكتب في الموضوع ده...طب أنا شخصيا فاشلة فيه، ونص أصحابي نفسهم يقاطعوني بس ولله الحمد ماهونتش عليهم، أعمل ايه؟؟ فضلت أفكر وأعصر دماغي ازاي أحسن من مستوايا في الموضوع ده عشان لما اكتب نصايح أكون موضوعية، لقيت ان الموضوع سهل وبسيط.

وقت الشغل طبعا صعب تتصل بحد أو تسأل على أصحابك، طيب لما تروح البيت؟ مفيش طاقة وتعبان وجعان؟ اه عندك حق، طب كل وخد الشاور بتاعك وابدأ "سوشيالايز"، اه محتاج تريح العضمة كبرت؟ معلش الف سلامة يا حاج، طب ساعة كدة ونبتدي؟؟ الساعة بقت 11 بالليل؟ ازاااي ده نصب، اليوم اللي حيلتي رااااح....أكيد ممكن تدفس وقت في النص تكلم فيه أصحابك...خد أمثلة

وانت في الشغل: عادي جدا كلم صحابك على الموبايل بإيد وابعت الريبورت بالإيد التانية، ايه اللي حصل؟ بعته لحد غلط!!! معلش فدا علا الاجتماعية

-وانت سايق مروح: بس ماتخليش الكوموستابل يشوفك عشان الرخص، غير كدة عندك ساااااعة وأكتر قضيها لك مع الشباب....دوست بنزين بدل الفرامل!!! 3 عربيات لبسوا ف بعض؟ ده قدر، وساعة القدر يعمى البصر، فين ايمانك بالله يا راجل؟!

-وانت بتسخن الغدا أو بعد الشر بتساعد في تحضير السفرة: حرق من الدرجة الأولى وخسائر مادية جسيمة ف طقم الصيني أبو شخروميت جنيه؟؟!! احم معلش كلها ذنوب بتتشال من على قفاك، وربنا يعوض

-وانت بتتغدى: في ايد ممكن تاكل بيها والتانية ابعت مسج للجروب على الواتس أب، لو اتزنقت حاول تنمي مهاراتك واستخدم رجلك يا في الأكل يا في الكتابة، اللي يريحك...امال ربنا خالقهم لييه الا للمواقف دي!!

-وانت بتستحمى: أيوة طبعا...الليفة ف إيد والتليفون في الإيد التانية، مايشغلكش صوت المية ولا الكلام الفاضي ده...المهم أصحابك يحسوا بوجودك في حياتهم، ايه؟؟ اتزحلقت وجالك كسر مضاعف في الحوض ؟؟ معلش ده قدر والحمد لله جت سليمة كان ممكن تموت متكهرب، قضا أخف من قضا واهو تاخدلك أجازة من الشغل وتتفرغ للتليفون بقى بلا تشتت

وانت بتريح على الكنبة اللي بره قدام التليفزيون (ده لو انت مش متجوز ولا مخلف): كلم أصحابك، طبيعي جدا ان المكالمة يتخللها صوت كونشيرتو شخيير و تقطيع وفترات صمت كتيير، تعالى على نفسك واجمدددد يا وحش المهم أصحابك

لو انت متجوز ومخلف، اضرب نفسك بالنار عشان الحل الوحيد انك تطلع ب 5 مناظر في حياتك عشان ترضي جميع الأطراف وتلاحق على الدكاترة اللي هيرمموا ما أتلفه الزمن

وأخيرا نصيحتي الوحيدة هي الويك اند، عندك يومين يوم عائلي ويوم أصدقاء (مراتك تمشي في الونجين يا خلبوص ماتتلككش، الا لو هي اديتلك اعفا يوم كتر خيرها قوم حب على ايدها) وأصحابك كمان لازم يكون عندهم قدر من المرونة والتفهم خاصة لو انت شخص حبوب لطوف عطوف وكل البنات بتحبك كل البنات حلوين "وانا وانا"...

كتير بنقصر في حق ناس على حساب ناس، لكن الناس ولاد الناس بيعذروا ويصبروا على الناس، ويا حاسدين الناس مالكم ومال الناس

 شيماء سعد/ ل موقع ياراجل

  

11/04/2013

http://www.yaragel.com/shoghl/63-ezay-twaf2-ben-shoghlk-we-2s7abak